Ижкарсянь Перымӧдз

Асывнас янсӧдчи мусир туялысьяслӧн вит кодзула общагакӧд. Комендантша весиг сьӧм медбӧръя войсьыс эз босьт, шуӧ сэтшӧм пӧ дона мортлы ми пыр радӧсь. Мыйла ме дона морт, коли гусяторйӧн.

Первой кӧсйи пыравны ИИЯЛ-ӧ, но, Оля талун, тыдалӧ, шойччӧ конференцияасьӧмысь да, эг шед. Пукалышті Кельмаков кафедраын. Сэсся Луша жырйӧ пукті удмурт корпусса файлъяс да FU-Lab папка. Альта раскладка налӧн комп. классын эм нин. Колӧ нӧшта пуктыны быд компьютерӧ LibreOffice да GoldenDіct и выльмӧдны Биаручтӧ, мед позис видлавны браузерас удмурт гижанногнысӧ. Но тайӧ мед Семёнов Саша нин вӧчӧ...

Коридорын удиті отсыштны ӧти студентлы вуджӧдны коми текст, пикӧ воис да. Пыралі нӧшта и литература туялысьяс дорӧ. Петкӧдлі Л. Витторлы, мый миян вӧчӧма коми кыв корпус да библиография кузя. Мортыс виччысьӧ удмурта-роча вуджӧдчан модуль.

13.40 ӟечлуаси кафедраын и деканатын  уджалысьяскӧд да котӧрӧн автовокзалӧ. 

 

Вокзаллань котӧртігӧн аддзылі татшӧмтор

Бадӟым тау удмурт эшъёслы! Удмурт шаерын Арсялы туж кельшиз. Куке кайта лыкто на! Удмурт но коми кылъёс понна огъя ужмы пайдалыко мед луоз!

Ӧдва удиті Перымлань мӧдысь автобусӧ. Тайӧ пӧрйӧ йӧзыс вӧлі тыр, прӧст места абу - нёль шойччан лун водзын да, ставӧн гортӧ тэрмасьӧны. Да и мунім талун зэв нин дыр. Туйсӧ потшӧма вӧлі да, мӧдлаті кытшовттӧг эг олӧй.

Но воӧдчи жӧ вӧлись. Ӧні гортын и колӧ бара коми кыв кузя мыйкӧ вӧчны...

Апостолалышті

Ижкарса собор

Асывнас сёрнитчи общагаса коменданткӧд да коли Ижкарӧ, нӧшта ӧти лун ола тані. Карыс лымтӧммӧ нин. Войтва виялӧ, шоръяс "котӧртӧны". Чуня кепысьяс ни ку шапка оз нин ковны. Ывлаыд шоналіс водз тувсовъя выйӧдз. Быттьӧкӧ йирым пыдди косму тӧлысь бара локтіс. Асывнас подӧн ветлі автовокзалӧдз да босьті Перымлань билет. Аски луннас мӧда нин.

Медбӧръя лун коли да, зіли унджык вӧчны - апостолалі кыв технология кузя.

Лун шӧр гӧгӧр уджалі удмурт кывтуялысь Толь Митрейкӧд. Сыкӧд коркӧ Финмуын тӧдмасьлім, а сэсся эг и аддзысьлӧй ёнасӧ. Петкӧдлі да коли сылы став миян программа да материал. Ӧтлаын ветлім студентъяс дорӧ. Тайӧ пӧрйӧ вӧлі нёльӧд курсса нёль нывка.  Найӧс тшӧтш тӧдмӧді миян сайтӧн да мый сэтӧн эм, кыдзи  пуктыны программаяс компьютерӧ, кутшӧм ногӧн программаясыс функционируйтӧны да мый да. Унакодь юасисны. Шуи налы, тіян водзын мися енэжтас ӧні паськалӧ, кыв туялігӧн выль ногӧн уджавны позянлун воссис да. Чайта да, интерес студентъясыслӧн лои, сэсся босьтчасны уджӧ. Велӧдысьяс кӧ чуйдӧдны кутасны. Митрейлы висьталі, мыйджык оз на тырмы миян базаясын.

Пажын бӧрын пукалыштім бара Кельмаков кафедраын. Медыджыд проблема тані - кыдз и миян: торъя кантораяс мӧда-мӧдныскӧд оз лӧсявны. Шуам, университет да небӧгаин. Сёрнитчасны кӧ коркӧ - зэв ӧдйӧ кутас мунны удмурт кыв корпус кузя уджныс... 

Пыраліс кафедраас Янне ӟечлуасьны, ӧти сайын корис менӧ асланыс универӧ. Мися коркӧ гашкӧ и вола...

Нёльӧд пара бӧрын петкӧдлі миянлысь вӧчӧмсӧ нӧшта ӧти татчӧс преподлы, Микул Надьлы. Сійӧ тані  велӧдан дискъяс лӧсьӧдлӧ да методика боксянь зэв тӧдчана морт. Мадьяр жырйын уджалім да, ӧттшӧтш сэн литератураысь пара вӧлі. Мыйсюрӧ вашкӧмӧн сямми жӧ висьтавны да петкӧдлыны. Вывті уна информация, шуӧ. Ладнӧ, мися, медколантор - ӧні сійӧ тшӧтш тӧдӧ, мыйджык вӧчӧма нин да мый колӧ эськӧ вӧчны удмурт кыв компьютермӧдӧм понда.

Пемдандор гижи SMS Ондреыслы, мися кытчӧ бара вошин. А сійӧ вӧлӧмкӧ мӧд лун нин дзик нинӧмысь видчӧ ӧтуввез тыр. Ставтор дугдіс мортыслы кажитчыны, ӧтнас коли да. Тшӧкті сылы шойччыны, орӧдчыны мыйкӧдыра кежлӧ интернетсьыс.

Сэсся рытывбыд кафеасим Лёшакӧд. Луша мыйкӧ висьыштӧ да эз лок тарыт. Тӧдмаси нӧшта ӧти удмурт нывкӧд, Маша нима. Журналистӧ велӧдчӧ да блог гижӧ. Зэв зіль морт, быдсикас нуӧданторъяс дасьтӧ удмуртлык котырын. Сёрнитім удмуртлык кыпӧдӧм йылысь. Мися колӧ шойччӧданторъясысь зумыдджык уджланьӧ йӧзсӧ кежӧдны. Лёшаыд кӧсйӧ котыртны удж удмурт кыв корпус да удмурт электрон библиотека лӧсьӧдӧм кузя. Быдпӧлӧс кантораяс да котыръяс мед ӧтсӧгласӧн сэсся уджаласны. Ас кыв кыпӧдан удж гӧгӧр кӧ удмуртъяс ӧтувтчасны, зэв эськӧ бур вӧлі. Но, ен мед отсалас налы.

Тӧдмасьӧм

Ижкарын сылӧ. Ва гӧпъяс туйясын. Эськӧ лымйыс пукалӧ на. Ен мед оз сылӧд дзикӧдз.

Пермистика помасис. Пукалі талун ӧти секцияын. Кылӧм серти кӧ, вывті веркӧсас татчӧс йӧзыс дасьтысьӧны конференция кежлӧ. Но, ог кут критикуйтчыны - ачым тай ньӧти эг докладась да.

Селина Алина

Конференция дырйи тӧдмаси перым коми аспирантка Алинакӧд. Зэв мича нывка. Юсьваладорса Микувысь. Олӧ Ижкарын. Аддзысьлім Луша жырйын. Тшӧкті землячкаӧйлы босьтны ас вылӧ перым коми .dic файл лӧсьӧдны. Сэтӧн колӧ быд кыв дорӧ содтыны кывсикас. Вӧчас кӧ тайӧс - позяс перым коми спелл-чекер керны. Сэсся вермас спеллер отсӧгӧн кывлад туявны выль тшупӧдын. Ачыс кывберд йылысь диссертация дасьтӧ да. Мыччалі Алиналы, мый миян вӧчӧма техника боксянь. Велӧді уджавны AntConc программаӧн. Дзик выльтор сылы. Ӧти сайын петіс эрдӧ, мый аслас накопительын вӧліны миян материалъяс, кодъяс йылысь нывкаыд абукодь и тӧдлӧма. Сэсся гашкӧ кутас бура тӧдны...

Талун жӧ вои кывкӧртӧдӧ, мися Ижкарӧ менам волӧмсьым эффектыс вывті ичӧт. Кӧзяеваяслы век некор да. Дивиті удмуртъясӧс, мыйла оз ёна окотитны примитны миянлысь тӧдӧмлунъяссӧ. Ньылыд сетчисны. Аски кӧсйысисны аддзысьлыны та кузя ӧткымынӧн. Бӧръя пленарка ни концерт вылӧ эг мун. Уджалышті Стрелкова Оля кафедраын, сэсся УдНИИ-ын коли Титова Оляыслы коми файлъяс - мыйта удиті. 

Рытнас пукалі кафеын: сёйим блинъяс да бурпӧт варовитім нӧшта ӧти удмурт нывкӧд (no comments).

Пермистика

Вӧлись заводитчис Пермистика-15 конференция. Ижкарӧ локтісны кывтуялысьяс Сыктывкарысь, Кудымкарысь, Перымысь, Глазкарысь, Мӧскуаысь, Петыркарысь, Йӧграысь да мукӧдлаысь. Конференцияыд сиӧма удмурт филолог Л. И. Калинина юбилейлы. Ме тайӧ морт йылысь водзджык эг и кывлы. А нывбабаыд удмурт да сибыр кывъяс туявлӧма, ыджыд спортсвумен вӧлӧма. Медальяс тыр. Пленаркаын чолӧмалім тайӧ пӧчсӧ. Сэсся сёрнитіс Мадьяр муысь локтӧм профессор Пустаи Янош. Сёрниыс кытшлаліс мордва гӧгӧр. Объекта да объекттӧм вежласьӧм да мый да вӧлі гарыштӧма. Таысь кындзи юӧртіс регыд пӧ сюрас сьӧм куим кыв вылын (коми, удмурт да мари) лэдзны электрон учебникъяс школаса дас предметысь... Пленарка помын питерса Мызников висьтасис роч диалектъясӧ перым кывъясысь пырӧм лексика йылысь. Эг и казяв, медым мыйкӧ выльыс вӧлі сылӧн басниас... 

 

Пажын бӧрын вӧліны секцияяс. Питерса Катя ёна нуӧдчис асланыс секцияӧ, но пыкси: кӧсъя мися лӧня пукалыштны кафедраын, удмуртъястӧ велӧдыштны электрон программаясӧн уджавны. Но удмуртъяс пӧвстысь некодыс эз и лок велӧдчынысӧ. Регыд весиг вӧтлісны кафедраысь. Ковмис коридорын практикуйтчыны удмурт ногӧн сёрниын Палэзиккӧд да Лушакӧд, Замятин Косьта тшӧтш орччӧн вӧлі, нош удмурт сямен со уг вераськы вал. Собере Кельмаковен пыримы одӥгаз секцие. Лексикология сярысь кенешизы отын. Помланяс нин пыри да обсужденньӧ сӧмын кывзі. Дзик помас, ком сюри да, юӧрті миян komikyv.com сайт йылысь, кытчӧ ставӧн вермӧны ыстыны ассьыныс гижӧдъяс да йӧзӧдны мукӧд материал.

Рытнас вӧлі банкет, кӧні конференцияса йӧзыс юисны, сёйисны, чолӧмалісны мӧда-мӧднысӧ... Пукалі орччӧн перым комияскӧд. Кӧчпосадса Олялы вӧзйи котыртны мыйкӧ семинар коддьӧмсӧ сэтчӧс велӧдысьяслы миян программаяс кузя. Сэсся тшӧкті ыстыны перым коми фразеология кывкуд миян dict.komikyv.ru сайтӧ. Вовпаса Люба юӧртіс, пӧшти пӧ нин помалӧма диссерсӧ. Локтан тулыс дорйысьӧ нин. Мудзӧма пӧ уджавны кӧчладорса велӧдысьяскӧд - дугдывтӧм пинь сэтӧн да. Перымса Аля бара ошйысьӧма перым коми кыв популярносьтӧн. Финн Янне тӧдчӧдіс, колӧ пӧ сэсся медводз туявны перым коми коддьӧм ичӧтджык кыв формаяссӧ...

20 час бӧрын нин бара аддзысьлім удмурт программист Гришакӧд, петкӧдлі сылы, кыдзи уджалӧ корпус менеджер да висьтаси миян техникаса майшӧг-падмӧд йылысь. Аддзысьлӧмсӧ котыртісны да примитісны сыын активнӧй участьӧ Палэзика-Лушаа. Чайта, Гриша вермас водзӧ уджавны удмурт кыв компьютермӧдӧмын. Но сылы колӧ отсӧг.

Аддзысьлӧмъяс

Коймӧд ижкарса лун заводитчис бара Mint-сянь. Выльысь видлім сійӧс Ондре индӧдъяс серти выльмӧдны. Бара дудіс - эськӧ мыйсюрӧ вермим жӧ лӧсьӧдны. Сэсся GoldenDict да коми раскладка мадьяр жырса виндаас пукті. Тшӧтш аснырасьӧмӧн муніс. Пуксис эськӧ-а.

Миян дырйи кык пара вӧлі жыръяд. Воддзаыс гозйӧн олӧмысь инӧдъяс кузя. Велӧдысьыс чуйдӧдіс удмурт нывъястӧ быть петны верӧс сайӧ. Сэсся пӧ судын позьӧ ӧтсудитны верӧслысь мый кӧсъян. Некутшӧма пӧ онӧ ворссьӧй.. Мӧд парасӧ нуӧдіс финн тӧдсаӧй Симо Кантеле. Тані мадьяр да финн кывъястӧ суйӧрсайсаяс и велӧдӧны. Эм быдсикас курсъяс, йӧз кывъястӧ велӧдӧны быд боксянь, ӧти кывйысь преподалӧ некымын велӧдысь. Бара абу миян дор орччаӧдӧмыс (Сыктывкар кӧть Перым босьт).

Небӧгвидзысь Аня локтіс да, лои дугдыны компьютерӧн ноксьӧмысь. Тэрыба пажнайтыштім Олякӧд да Ӧльӧксанкӧд студ. вердчанінын. Сэсся муні Анякӧд небӧгаинӧ. Ӧні налӧн нац. библиотекасӧ дзоньталӧны да кар пасьтала разӧдӧмаӧсь торъя юкӧдъяссӧ. Аняыс пукалӧ Удмурт туйдорса керкаын. Корис айтишникнысӧ да сканералысь нывкасӧ. Петкӧдлі, мый миян эм техника отсӧгысь. Коми корпус кузя компьютерщикыслӧн лои юалӧм - а мыйла тайӧ колӧ. Збыль тай - мыйла сійӧ миянлы... Аня ёна кӧсйӧ удмурт корпуссӧ небӧгаинас лӧсьӧдны. Зэв зіль да лют ныв. Ме ногӧн, сійӧ вермас подулавны шепъяс водзын, мый тайӧ ёна и ёна коланатор. Олі Аняясын рытся сизим часӧдз. Сійӧ петкӧдліс, мый налӧн библиотека вӧчӧма нин электрон ылдӧсас, да мый кӧсйӧны вӧчны. Ачыс медсясӧ и водзмӧстчӧ вит во чӧж нин. Уна мый вӧчӧма. Збыль тай, зіль мортыслӧн ставтор артмӧ. Жаль миян комияс озджык зільны коми кывтӧ лэптыны тайӧ юкӧнын. Казьтыштім бара Гёттингенсӧ, уськӧдім тӧд вылӧ тӧдсаинъяс да тӧдса йӧзӧс...

Сизим час бӧрын нин аддзысьлі миян бур ёрткӧд, Палэзиккӧд. Пукалім кутшӧмкӧ кафеын, сёйим пицца. Нывъёртным кынмаліс да висьыштӧ. Но ловнас оз усь, век збодер да гажа. Кӧкъямыс бӧрын матыстчисны Лёшаа-Лушаа да неуна сёрӧнджык программист Гриша. Тайӧ куим мортыс материализуйтчисны ме водзын талун медводдзаысь, водзджык налысь нимъяснысӧ сӧмын ӧтуввез пыр аддзылі, либӧ Ондресянь кывлі. А тані ловъяӧсь! 

Лушаыд дзарпасалӧ

Ужнайтім да варовитім быд сикас тема вылӧ. Компьютер программаясысь блогъясӧдз. Слабог лои позянлун сёрнитыштны удмурт ногӧн. Ачым тайӧ кывсӧ важӧн эг практикуйт да мыкталӧмӧн сёрнита. Мукӧдыс пыр и вуджӧны рочӧ, а тані эз. Тайӧ меным ёна кажитчис. Дасӧдз пукалім кафеын. Сэсся, колльӧдім Палэзикӧс президент дворечбердса гортӧдзыс да, общагаӧ бӧр локті. Унмовсьтӧдз удиті на текставны ӧти ичӧтик небӧг.

Удмуртъяскӧд

Мӧд лун Ижкарын. Садьми югыдысла. Сэзь енэжа асыв. Еджыд му дырйи шондінас зэв и мича. Жырйын лӧсьыд да, эн кӧть и петав. Но быть. Локті универӧ 10 час кежлӧ. Тӧрыт мем шулісны, вежалунӧ пӧ университетаныс лэдзӧны сӧмын спецлэдзӧг серти. Но мыйлакӧ талун, тыр студент шуксьӧ да, меланьӧ эз и кыйкнитлы керкавидзысьыд. Кафедра вылас колана йӧзыд чукӧртчӧмаӧсь нин. Юим копей. Сэсся вит час чӧж петкӧдлі кык студент зонкалы да Ӧльӧксанлы миян программаяс. Галя-фольклорист тшӧтш вӧлі.  Буракӧ мыйсюрӧ гӧгӧрвоисны зонъяс. Сэсся колас кыдзкӧ практическӧя вынсьӧдны тӧдӧмлунъяснысӧ. Тайӧ том удмуртъяслӧн мог ӧні - вайӧдны инфасӧ став удмурт филологӧдз.

Куим час бӧрын йитчим Ондреыскӧд да часӧн-джынйӧн лӧсьӧдім вӧлись тӧрытъя минтсӧ. Ӧні позьӧ нин пуктыны компьютерас колана программаяс... Окота вӧлі рытӧдз пукавны универас, но Ӧльӧксанлы ковмис мунны грездас, сійӧн ковмис орӧдчыны.

Рӧмдандор ӧтнам шӧйтышті Ижкарса туйяс кузя. Видзӧдалі кар шӧрсӧ. Стильяслӧн сорас тӧдчӧ. Но татчӧс юралысьяслӧн дворечьяс зэв импозантнӧйӧсь. Меным тай кажитчисны.

Бӧр локті туйкеркаӧдз да сэсся войӧдз тексталі коми небӧгъяс. Ӧтуввезтӧг и компьютернас гажтӧм. Велалі нин пыр лоны йӧзыскӧд йитӧдын. Кӧть, мӧд боксянь кӧ, йӧзсьыс орӧдӧмӧн верман бурджыка концентрируйтчыны удж вылас...

Ижкар

Чеччыны лои вӧвлытӧма водз - Сыктывкар серти кӧ вит часӧ. Перымас тай кык часӧн торъялӧ кадыс Мӧскуаыдкӧд, да тані сизим нин вӧлі. Автовокзалӧдзыс нӧшта и воӧдчыны колӧ, ӧд кар шӧрӧдзыс часысь унджык лоас - абу кӧ на потшӧма туйсӧ. И удмурт автобус 9 час 10 минут мӧдӧ нин. Унзільпырысь дзик ковтӧм асъя сёйи (гортсаяс вердӧмӧн вердісны да), ноп мыш саяс кышалі да джынвыйӧ вӧтасигмоз бара коли горт...

Ывлаыс турӧбалӧ, кыдзи тай удмуртъяс шуӧны педлон жобаське. Медъя. Карса автобусын кузь туй сулалігмоз вугралі. Автокеркаӧдзыс локті буретш 9 часӧ. Ыджыдысь ыджыд автобусӧн сэсся Ижкарӧ мӧдӧдчим ичӧт котырӧн: пассажирыд вӧлі вит верстьӧ морт да кык кага. Бариналі бара. Унмовси лымйӧсь вӧр вылӧ видзӧдӧмысь да садьми сӧмын Кама юсӧ Вотка помӧдӧд вуджигӧн. Вавидзаныс абу на кынмӧма да гыӧн ветлӧ ва веркӧсыс... Мунім этша водзӧ да туй индан пӧв вылысь и медводдза удмурт ним казялі - Мунчогурт (Пывсянгорт коминад кӧ). Со мися и вои бара рӧдвуж войтыр му вылӧ. Коркӧ тай, во ӧкмыс сайын, волі жӧ удмуртъясӧ, но дзик вушйис нин та йылысь казьтылӧмыс тӧд вылысь, мӧд олӧмын быттьӧ тайӧ вӧлі...

Туй план серти кӧ сизим час коліс мунны Ижӧдзыс, а локтім кык часӧн водзджык. Сійӧн дерт некоді эз и вочаав. Йӧзыслысь юасигмоз воӧдчи УдГУ-ӧдз. Керка видзысьыс корис паспорт да юасис зэв тешкодя - экзамен пӧ сетны локтан ли мый ли? Но мися, дзор тошка дядьӧлысь кӧ татшӧмторсӧ юалӧ, кутшӧмӧсь тані  студентъясыс...

Удмурт кафедраас Наташ да код да гажмисны - ӧт-кӧ менӧ аддзӧмысь, а мӧд-кӧ, содтӧд нок эз ло, ас кокӧн воӧдчи да. Ветлім пажнайтны Универкафеӧ куим препод (Наташ, Оля, Галя) да ачым нёльӧд. Универкафеыд дерт матӧ абу пастпудным, буди донъясӧн вермас жӧ панласьны-а.

Пажын бӧрын Олякӧд ветлім видзӧдны оланінӧс. Вӧлӧма зэв крутӧй номер мусир перйысьяслӧн общагаысь, туйкеркаын кодь. Керка видзысьыс "ина удмурт" - кытыськӧ Шӧр Азияысь тӧдчӧ, чужӧм да акцент серти кӧ. Но гӧсьтыдлы петкӧдліс зэв ыджыд радлун да, быттьӧ европаса отельӧ веськалі.

Ставнас босьтӧмӧн Ижкарыд Сыктывкар бӧрын суйӧрсайӧн кажитчӧ. Коми карын эськӧ тшӧтш латинича гижӧдъяс кӧнсюрӧ ӧшалӧны. Но тані найӧ дзик быдлаын. Лавкаыд кӧ игналӧм, сідз и гижӧма - closed, ставлы гӧгӧрвоана. А со удмурт ногӧн весиг туй нимъястӧ абу пасйӧма. Сӧмын рочӧн. Буди ӧткымын канкеркаӧ пыранін дорас кык кывъя табличка тувъялӧма... Татшӧм гижӧдъяссӧ тан тшӧтш сералӧны, миянын моз жӧ. Лӧсьӧдӧм политикаса терминъясыд йӧзыслы оз кажитчыны да, ачыс канудж кодь жӧ.

Но мый, коли шылльӧ-мылльӧсӧ веж петкӧдлана номерӧ да бӧр локтім универӧ. Пыр и босьтчи уджӧ. Удмуртъяслӧн эм Саша нима компьютерчи, велӧдчӧ на. Мортыс век уджалӧма сӧмын виндоуз системаын да, миян линукс сылы шнич выльтор. Видлім пуктыны Mint ӧти компас, но мыйкӧ проксинас кутіс ыръянитны налӧн везйыс. Квайт час сэсся мырсим-вийсим, юр висьӧмӧдз лои. Ондре слабог контакт пыр отсасис, миянӧс пинялігсор дерт... Унджыкторсӧ эськӧ лӧсьӧдім кыдзкӧ-мыйкӧ, но выльмӧдны минтса программаяс сідз и эз артмы проксиысла.

Рытнас ветлі гӧститчыны декан ордӧ. Унатор удитім пельнянь сёйигчӧж видлавны. Гӧгӧрвои: удмурт филологъястӧ вузаныс чорыда на дасьтӧны (куим ыджыд группа кӧ босьтӧны медводдза курсӧ), а кыдз Сыктывкарын вермисны быгыльтчыны ӧнія гу пыдӧсӧдз - гӧгӧрвотӧм...

Войся Ижкарӧдыс ветлі эг подӧн: гӧсти менӧ Ӧльӧксаныд ас машинаӧн журӧдіс, а бӧр туйкеркаӧдз таксиӧн локті (тані 97 шайт донаӧсь тачкаяс). Номерӧдз воӧдчи да мыйкӧ сэсся уджавны вынӧй эз нин судз - пыр и сурсмуні небыд вольпасяс.

Уджтӧм лун

Талун бӧра ветлі карӧ. Босьті белет ашыння автобусвӧ Ижевскӧдз. Пета наттьӧ 9.10, локта удмурттэз канкарӧ 14:30. Ӧтӧрас сё лымьялӧ, пурга-падера оз чин. Поди и тыртас туйесӧ да, огӧ ештӧ ас кадӧ локны. Но сё ни локта, коли пета.

Кар шӧрӧ шеді да луннас попуте мӧдпыр пыралі универаным. Тӧн эг застанит, а талун пантаси даки перем коми кафедра вылын Алякӧт, кӧда коми-пермяцкӧй лингвистикаӧн веськӧтлӧ. Сія висьтасис, кыдз нія олӧны. Ачыс да кык лаборант - Лена да Марина. Тыртӧны жӧ нійӧ гумаганас, вештӧны етша жӧ. Но кыскӧны тай додьсӧ. Кык аспирант пӧ ӧні татісь комиэзлӧн. Ӧтыс Ижкарын велӧдчӧ, эг юась кин бердын. Мӧдыс, Ленаыс, уджалӧ кафедра вылас, коми морфология сьӧрті гижӧ. Лыддьӧтӧ студенттэзлӧ уна курс и ӧддьӧн пӧ кужись нывка. Мыся, Аля, ноко сійӧ миян дорӧ Сыктывкарӧ коммандируйт. Велӧтам программаэзӧн уджавны, сыбӧрын татӧн быдӧннытӧ велӧтас.  Сэк и морфоанализатор, и орфография модуль, и эл. кывчукӧр да мый да аслыныт лӧсьӧтны верматӧ. Ачыс нывкаяс татӧн жӧ вӧлі. Мыччалі сылӧ миянлісь сайттэз да велӧті уджавны антконк программаын. Сылӧ некӧ гленитчис, кӧсйис сэсся гуддьсьыштны сайтас.

Ме дырни кабинетас пыралісӧ студенткаэз - комиӧн баитӧны (пермяцкӧй нёж). Пасибӧ висьталісӧ коми раскладка понда. Телепоннэзын пӧ унаэзлӧн ни эм сія. Олӧны комиэз татӧн сідз-ту неумӧля. Таво пӧ коми отделеннёын велӧтчыны сетісӧ документтэз 20-ся унажык абитуриент - 16 места вылӧ. Исьтиковскӧй сьӧрті Сыктывкарын таво классиккезлӧн 10 места вӧлі, а велӧтчыны локтісӧ токӧ кыкьямыс морт... Коми группаэсӧ Перемас абу ӧтлаӧтӧмась роччезкӧт, кыдз зыряналӧн. То и думайт, кин чожажык рочсялас.

Ӧні коми пермячкаэз лӧсьӧтӧны лэдзны виль перем коми кывлад (грамматика) педучилище понда. Комиӧн. Быд год лэдзӧны сборниккез. Кыдз и ештӧны - ог вермы висьтавны.

Гортӧ рытнас локті да эг ни уджав. Мӧдіккез уджалӧны да мыйлӧ! Лыддьӧтышті, кывзышті музыка, видзӧті важ фоткаэз. Арся вӧлись шоччисис!!! 

Викинггез посадын (Норвегму). 2010ʼ вося розосво.

Alma Mater

Ну вот, бӧрыннас и гӧгӧрвои: коми ПРО-нас тай Арся и вӧлӧма. Луннас тӧрыт лэбзи Сыктывкарысь, а рытнас и тӧлӧма вӧлись Коми муын... Дорйӧг эз ло нин да. А нӧшта и кайзеръяс вылӧ грекуйті, мыйла рипаблик лымтӧг кынтӧны...

Талун бара казялі: овны ӧнія ыджыд карын - асьтӧ бырӧдны. Час автобусӧн кар шӧрӧдз, час бӧр... Стресс...  

Перымса педуниверситет

Ветлі сідзсӧ Alma Mater-ӧдз. Пыралі коми кафедраӧ, завсӧ эг су, сы пыдди тӧдмаси лаборант нывкӧд. Магистрасьӧ жӧ, гижӧ удж "перым коми кывйын кулӧм да олӧм концепт" кузя. Зэв мися актуальнӧй темаыд... Юӧртіс, забыль, коми студентъяс пӧ вӧдитчӧны коми раскладкаӧн... Кафедраыс оз.  Абу солиднӧ да...

Пыралі историкъяс дорӧ. Налӧн ставыс важ моз. Весиг факультетъяс на олӧны. Некутшӧм институт сяма новацияяс абу тшыкӧдӧмны татчӧс нэмӧвӧй оласног. Но мися кӧть тайӧ бур.

Карыс лымйӧ вӧйӧ нин. Усьӧма пӧ тӧлысся норма да и водзӧ лымъялӧ. Соба багыль Перымті да казьтыла тӧрытъя кос на Сыктывкар...

Рытнас лукйыси небӧг джаджъясын. Нигаяс гортын тыр да, он и тӧд мый лыддьыны войдӧр, мый сэсся. Мыйта вежӧра мӧвп тубыртӧма тайӧ коркаясӧн. И окота йиджтыны ставсӧ выльысь, унатор пӧрысьӧ нэмӧ вунӧ нин да...

Лунвылӧ лымла

Мукӧдыс ветлӧны саридз дорӧ шонділа, а Арсялӧн ставыс гугӧн да, лунвылӧ лымла талун мӧдіс.

Асывнас ветлі билетла. Кӧсъя мися лэбны Перымӧдз, эм абу талунъя рейс вылӧ мыйкӧяс. Кассирша видзӧдіс компас, шуӧ абу пӧ нинӧм. А аскиа рейснас кыдзи? Видзӧдліс - абу жӧ. А пекнича? Корсьысьыштіс, шуӧ, сӧмын пӧ вежалунся билет выйим... Но мися, вежалун мем сёр ни лоас, бергӧдчи нин мунны. Автобусӧн мися ковмас чушкыны. А бӧрсяньым: "Том морт, вай ме звӧнита-тӧдмала - гашкӧ кутшӧмкӧ броньтор коли жӧ..." Тӧдмаліс: ӧшалӧ пӧ ӧти бронь. Но стӧча пӧ кутам тӧдны, локтан кӧ кык час кежлӧ. Ладнӧ, мися.

Кык часланьын бара вои аэрокеркаӧ - мӧд ныв нин кассаын. Тадзи и тадзи мися. Абу на билетыд, шуӧ. Кызь минут виччыси - бара матыстча. Юалӧ, мый тэныд кӧсйысиснытӧ? Мися - броньтор пӧ довжӧн кольччыны... Звӧнитіс бара кытчӧкӧ, дыркодь телефонасис - и сюри жӧ! Билетаси да гортӧдз ӧтарӧ-мӧдарӧ тачкаӧн журӧбтылі - багаж босьтны.

Досмотрасим ыджыд майшӧгъястӧг, эськӧ мегыр пыр пыригмоз зёльӧдчи жӧ. Но лэдзисны - пертасӧй тыдалӧ надейнӧйӧн кажитчис. Медся тешкодь дерт самолётын - 18 инсьыс 4 прӧст. Сідзкӧ менам броньтор вӧлі вель на и зумыд. Барин моз ӧтнам пукалі кык креслӧын.

Кыпӧдчим Сыктыксянь да пыр и кымӧрӧ сюрим. Со тай сетіс мися вӧлись Енмыд мукӧд коми кывбур гижысьяслы моз кымӧръясті лэбалыштны. Кутшӧмкӧ фразаяс да мелодияяс кутісны бергавны юрын, рифмаясӧ тэчсьыны. Но ӧшинь сайын дыркодь нинӧм эз тыдав да, вугыр босьтіс.

Сэсся коркӧ палялі - енмӧй: гӧгӧр сӧстӧм, уна рӧма енэж, шондіыд енэжтас сайсянь медбӧръя югӧр нин ыстӧ. А улын - сваль кымӧра саридз. Кымӧра му веркӧс ли - аслас слудаясӧн и сёнъясӧн. И ставыс вӧляника вӧрӧ... Тадзи пивъя океан весьтӧдыс зэв дыр шлывгим. Нимкодясьны он мудзлы татшӧмторнас. Сюрреализм кодь мыйкӧ. Лисовскӧйыд татчӧ эз тырмы. Ачым вӧчи жӧ дзарпас-мӧд.

Кӧнкӧ сэн, кымӧра саридз улын, ойбыралӧ лымъя Перым му. Миян весьтын - сӧстӧм енэж. Шондіыд муртса на саймовтчис...

Перым дорӧ матыстчигӧн бара тювкнитім кымӧрӧ-руӧ. Буретш пемдӧ вӧлі. Но романтизмлӧн руыс ни пемыдыс эз нин вӧв тайӧ пӧрйӧ. Жувгисны ёна лэбӧг моторъяс да юрам ӧттшӧтш жувгыны кутіс, пельтӧммылі и. Пуксим слабог некытчӧ татшкысьтӧг...

А чужан карӧй и збыль лымъя нин вӧлі. Толаяс быдлаын. Кӧнсюрӧ ыджыд керӧсъясӧн нин пукалӧ лымйыд. Вештасьны транспортӧн сьӧкыд. Миян тай шуӧны татшӧмтор йылысь - уброд. Аэропортсянь трассаӧдз петігмоз 500 метра костсӧ автобус вуджис джын часӧн. Туйшӧныс тырӧма лёгкӧвикъясӧн, и мукӧд машина вешйӧны ылӧджык бокӧ да сибдӧны лымйӧ. Тадзи и миян bus. Бульдозер отсӧгӧн кыдзкӧ кыскисны жӧ. Сэсся кар кузя кык да джын час чӧж кыссим гортӧдзым. (Сыктывкарсянь Перымӧдз туйным часӧн-джынйӧна вӧлі-а). Тані вунӧдісны нин сьӧд мусӧ. Тӧв и тӧв. И шуӧны - кузя пӧ нюжалас сійӧ.

А гортын шоныд да лӧнь. Мый нӧшта колӧ таладор олӧмад???

Практика

Ёртӧй висьтасис талун - локта пӧ тавой Кылнасянь Сыктывкарӧ. Вуджим Даниловка. Сэн Коми суйӧрӧдз сваль лым куйлӧ. Суйӧр выв пас вуджим - куш му. Со тай кыдзи вӧлӧма - тыдалӧ кайзеръяс гусьӧн лӧсьӧдӧмаӧсь нин аналог ПРО - лымйысь доръян система. Сӧмын тай Коми Республикатӧ кӧдзыдысь доръян система лэдзны вунӧдӧмаӧсь... 

Ме дак аски муна лымла лунвылӧ, чужан Перым карӧ. Гашкӧ оз на сэктӧдз удит сывны сэтысь.

Асывнас волісны студентъЁс, коймӧд курс. Практика налӧн комп. технология кузя - ӧтчыд вежон. Мися текставны талун кутам небӧг да, быдыс мыйкӧ уджалыштас. И сэтчӧ ӧткымынӧн видлісны няргыны - ми пӧ велӧдчыны локтім, эг уджавны. Ондресянь дерт дыш кульяслы вӧлі чорыд воча кыв. Аттьӧ эз мисьтӧм кывъясӧн вӧтлы найӧс. А Вась Лена ставнысӧ выя бордйӧн мавтӧ, жалитӧ. Со и вельмӧмаӧсь кодсюрӧяс вокорень, сьыліӧ велӧдысьяслы вожасьӧны нин... Но миян тані абу киссян выйӧ вайӧдан СыктКУ. Аддзи налы челядь небӧг да, ставӧн полігтырйи тексталісны сэтысь листбок-мӧд. Бӧрыннас вайӧдім тексталӧмнысӧ спеллерӧдз. Ӧні кӧть тӧдны кутасны, кыдзи коми небӧгтӧ текстӧ пӧртны. Унджыкыслы дерт тайӧ матӧ оз ков, но кык-куим ныв тайӧ группаысь буракӧ авъяджыкӧсь, вермасны сэсся татшӧм уджсӧ и медӧн вӧчны.

Пажнайтім корсюрӧ блогйывлысь Кола Микулайкӧд - мортыс выль принтер ньӧбӧма да радувъяс распечаткаяс вӧчалӧ. Важын пӧ нин колӧ сетавны макет да мый лыддьынысӧ йӧзыслы, а важ принтерыс жуг-жаг. Сэсся со кокняммӧма мортыслӧн... Ӧти сайын, Микулайыд ыршасьӧ диалект кывкудсьыс мӧд том сетны печатьӧ регыдъя кадӧ нин, кӧнкӧ Ыджыд Йирым бӧрын. Видзӧдам, кыдзи АРТмас.

Муртса на пасьтаси билетысла ветлыны, воис вошлӧм Дашукным - практикуйтчыны лои сылы миян дінын гожӧмнас, а ӧнӧдз кыскӧма. Олӧмнас коньӧр нывкаыдлы комп. ворсӧм лои да. Мукӧдтор эм кӧть абу. Но со вузсьыс вӧтлан здук югдіс - и локтіс. Зэв зіля талун уджаліс: 5 часӧн Гримм вокъясӧс пӧдӧфаліс да коми фольклорысь хрестоматия сканераліс (Ӧльӧш, виччысьышт!). Мый нӧ, ставсӧ томъяс кужӧны и вермӧны - окота сӧмын абу налӧн. И мыйӧн мотивируйтны... Ондре эськӧ татчӧ шуис кыв-мӧд. Но немтор слабог эз шу талун сэсся, Лы Туныскӧд рытывбыд дипломаталісны да.

Рытладор тӧдмаси нӧшта висервожса нывкакӧд, коді ӧні Лӧкчим вожын роч челядьӧс коми кывйӧ велӧдӧ. Марина тшӧктіс сылы удж вылӧ сетны роча-комиа кывкуд интегрируйтны, ӧти юкӧнсӧ. Пуктім ноутас коми раскладка да мукӧд колана программа, петкӧдлі-велӧді кыдзи кывкудса статьяяс лӧсьӧдавны. Воим сёрниӧ да, зэв тай вежӧра вӧлӧма нылыд, лингвистикаысь быдтор гӧгӧрвоӧ, магистрӧ ӧттшӧтш велӧдчӧ. Со мися нӧшта ӧти уджач коми морт дась коми кыв лабораторияӧ. Пуктас кӧ коркӧ республикаыд коми кыв сӧвмӧдан уджнымӧс зумыдджык подув вылӧ...

Аслам уджӧй войт мында и вӧлі талун. Вой кежлӧ буди Гугов тетрадь да Куратов вуджӧдӧмысь вит-ӧ-квайт кывбур иналі ӧтуввезйӧ. Вайӧда татчӧ узьӧм водзын лыддьымӧн ставлы тӧдса произведенньӧ.

Оз туй

Нинӧм выльсӧ сьӧрас эз вай выльлуныд тайӧ олӧмас. Лымйыс кӧнкӧ Мӧскуасӧ тыртіс, а миян век на куш му. Тӧвйыс бус на гартлӧ. Куньса синмӧн лоӧ ветлыны. Шемӧс.

Помалі спеллеравны Ӧльӧш Ваньсӧ. Дзоньнас нин небӧгыс базаын куйлӧ - кодкӧ сэсся мед сайтас пуктас коляссӧ...

И. Куратов серти кывкуд пукті жӧ ӧтуввезйӧ. 1979ʼ вося лыддьӧгыс вывті унапӧлӧс: и неологизм, и диалектизм, и суйӧрсайса нимъяс, и интернационализм - ставыс ӧтгудыр. Кор кутам вӧчны выль кывкуд Куратов гижӧдъясысь, позяс дерт ставсӧ торйӧн тэчавны...

ОЗ

Пыраліс Куим Ю Лена да тшӧктіс гижны Туй дорӧ Оз туй. Гижи. Оз туй гижны рифматӧг, но оз туй и ӧти кывтӧ дугдывтӧг рифмуйтны. Уммытӧдз лоас весиг озйыс, оз сӧмын туй...

Нуи коми кафедраӧ финн-йӧгра войтыр кузя видеояс. Ӧттшӧтш сёрнитышті завыскӧд - вай мися студентъястӧ кутам велӧдны кыв корпусӧн уджавны. Кӧсйис думайтыштны. Аттестация бӧрын гашкӧ. Аски виччысям Вась Ленаӧс коймӧд курснас. Интереснӧ, кор нӧ ошкӧмӧн ошкӧм мӧд курс кисьмас корпуснӧй уджӧдз? Ӧд позьӧ сымда курсӧвӧй да диплом вӧчны корпус подув вылӧ мыджсьӧмӧн...

Рытнас йитчи Діюрсакӧд да пуктім сылысь библиографиясӧ ӧтуввезйӧ. Мед и водзӧ гижӧ комиӧн, Лы Тун ногыс кӧ, сылӧн пӧ эм сямыс.

Вой кежлӧ тексталі пасйӧдъяс Ӧльӧш Вань кывбуръяс дорӧ, а Вомынсалы сеті тексталӧм могысь Есенинӧс, Мелілун-2-сӧ да Курыд зарава. Буретш лыддяс сэктӧдз, кор ме лунвывсянь бӧр локта. Ондре кӧнкӧ пӧ Яткаясті нин мустӧммӧм (сы терминологияын магниттӧм) Сыктывкарлань локтӧ - вайӧ сьӧрас турӧб.

Ӧльӧш Вань

Кыдзи нӧ шуны татшӧм кад, кор ывлаыс код лун нин минусалӧ, а лымйыд век на абу шебралӧма мусӧ? Минусовка, шуис эськӧ Ондре. Лымтӧмлун - шуис эськӧ Йӧлгинь. Сідз и этадз лымтӧмалам.

"Кӧдзыд да шонді - лымйыд абу,
Вай, рочаканьӧй, садьмы нин..."

Стоп - тырмас рифма подбирайтны, колӧ делӧ делайтны. И нинӧм тэныд, Арся, норасьнытӧ: со ар на да. Календарса тӧлӧдзыс тӧлысьӧн-джынйӧн на... Да и пукалан лабора торйын, кӧні Сахараын кодь жар да биыд пӧшти оз куслы - ӧтуввез пыр муюгыд тыдалӧ и.  Ёнасӧ миртӧ видзӧдавны бара некор - уджыс помасьлытӧм, кыдзи ачыс олӧмыс, кодлысь донтӧ...

Талун выльысь нокси дас ӧкмысӧд нэмся классикнаным, медводдза коми поэтӧн. Веськыда кӧ - Ӧльӧш Ваньыд мудзтӧдӧ нин. Ставсӧ кодь нин лыддьӧма сылысь да сы йылысь... Жугыльмӧдӧ ёна. Кӧть и югдӧ ылын... Сы гижӧдъяс пыр келан да век бергалӧ юрын уджъёртӧйлӧн курыд шмонь: пессимист пӧ - тайӧ бура информируйтӧм оптимист... Чистӧ коми оптимизм ясыда тӧдчӧ сы кывъясын, шуам сэк, кор поэтыд кӧсйӧ,

Мед ловъя коляс ӧтнас Ен
Мӧд югыд вӧчны коркӧ сэн...

Дженьыда кӧ, окота ӧдйӧджык инавны шӧйтысь кометасӧ базаӧ да босьтчыны гажаджык гижӧдъясӧ...

Уджалігкості пемыд лоис абу сӧмын лолын, а тшӧтш и ывлаын. Но пыраліс Вомынса да югыд вайис сьӧрас. Уджалӧма жӧ талун. Кайлім сы дорӧ. Мортыс помаліс текставны Напалковлысь роман, пӧртім текстсӧ odt форматӧ. Сэсся кык коми морт дыркодь варовитім ӧнія коми культура да коми кыв йылысь. Зонмыд зэв паськыда мӧвпалӧ да зільӧ мыйкӧ буртор вӧчны ас войтыр вӧсна. Ен мед отсалас сылы видзны веськыд туйсӧ.

Нӧшта на кӧсйи мыйсюрӧ гижны-а, вой шӧр нин матыстчӧ. Юрӧй тшӧтш шӧри нин потӧ.  Муна нокӧ тавой гортӧ... Аски йӧзаджык лоам да гашкӧ унджык гижантор сюрас, босьтам ёнджык тема...

Ог удитлӧй нинӧм...

Субӧтаси бара.  

Ӧтнамлы йӧзтӧм Печать керкаын гажтӧм пукавны да, асывнас ветлі маршакъясӧ, нуи Тувсовъялы "Чибльӧгсӧ". Чаюйтыштім да сёрнитім кад абутӧм йылысь. Соборуйтӧны пӧ выльлунӧ республикаса библиотекаръяс, и на водзын блогъёртным час чӧж кутас лыддьыны лекция. Темасӧ ог и пасйы татчӧ - вывті жӧ кузь да научнӧй. Со талун и дасьтысьӧ. Блог гижны бара кӧнкӧ оз удит...

Луннас воліс Верук, вайис тексталӧм "ӧшкамӧшкасӧ" да нуис "рӧдвуж пас".  Ыззьӧда сійӧс тшӧтш блогйыны, но кытчӧдз весьшӧрӧ - кад и сылӧн абу да.

Ондреыскӧд йитчим ӧтуввез пыр да лӧсьӧдім вӧлись FineReader программаӧ удмурт кыв кузя пыкӧд-кывкуд. Сэсся и удмурт нывъяс вермасны кокниджыка текставны небӧгъяснысӧ. Слӧймасны кӧ.

Ёшкаын, забыль, лым нин кыза вевттьӧма мусӧ, машинаяс пӧ ӧдва ветлӧны. Нуин тэ мися, ёртанӧй, тӧвсӧ сьӧрсьыд... Миян тай эз и убӧлит тӧлкӧн пуксьыны... 

Рытнас спеллеруйті Ӧдя Васьлысь "Вуджанінсӧ" да тексталі Ӧльӧш Ваньлысь комиӧдӧмсӧ. Ставсӧ эськӧ бара эг удит-а.

Вой кежлӧ комиӧді сьӧдас важъя бельгияса сьыланкыв "Forgiven". Коми поэтессаяс вермасны и шыльӧдыштны, ком кӧ налы сюрас...  А текстыс эськӧ-й нач этша - бара и бара нывкаыд сійӧс жӧ дольӧ - нимкыв моз... Кымынысь нин и кывлі татшӧмторсӧ...

Эн дивит!

Ме лои туйтӧм тэнӧ коли да
Йӧзкӧд ловтӧм войяс колльӧда

Некор немӧн эг дойд тэнӧ
Некор тэныд эг вай шог
Вывті жеб да менӧ шӧйӧвоштіс лёк.

И менӧ вай эн дивит
Ме мӧда бара шедны сывйӧ тэн
Эн менӧ дивит, тэ бара колан мем
И менӧ вай эн дивит
Ме мӧда бара шедны сывйӧ тэн
Эн менӧ дивит, тэ бара колан мем
И менӧ вай эн дивит

Весьӧпӧра мыжъяс пыдӧсын
Он кӧ лэччыв менӧ мездыны

Некор немӧн эг дойд тэнӧ
Некор тэныд эг вай шог
Вывті жеб да менӧ шӧйӧвоштіс лёк

И менӧ вай эн дивит
Ме мӧда бара шедны сывйӧ тэн
Эн менӧ дивит, тэ бара колан мем
И менӧ вай эн дивит
Ме мӧда бара шедны сывйӧ тэн
Эн менӧ дивит, тэ бара колан мем
И менӧ вай эн дивит

Некор немӧн эг дойд тэнӧ
Некор тэныд эг вай шог
Вывті жеб да менӧ шӧйӧвоштіс лёк

Некор немӧн эг дойд тэнӧ
Некор тэныд эг вай шог
Вывті жеб да менӧ шӧйӧвоштіс лёк

И менӧ вай эн дивит
Ме мӧда бара шедны сывйӧ тэн
Эн менӧ дивит, тэ бара колан мем
И менӧ вай эн дивит
Ме мӧда бара шедны сывйӧ тэн
Эн менӧ дивит, тэ бара колан мем
И менӧ вай эн дивит
Ме мӧда бара шедны сывйӧ тэн
Эн менӧ дивит, тэ бара колан мем
И менӧ вай эн дивит

Вежон помланьын

Вежон помланяс ӧтарӧ кӧдздӧдіс - лым куйлыштӧ му вылас. Ывлаас йирмӧг босьтӧ. Ветлам-кынмам Ондреыскӧд. Слабог гежӧдика петалам Печать керкасьыд...

Асывнас асъя сёйны пыралі Сюръяас, а сэні Нэмдінса. Ӧтлаын рок и панялім. Сійӧ вежон мысти мунӧ нин шойччӧгӧ, а сы пыдди выль нывка локтас уджавны Йӧлӧгааныс. Ӧти сайын, талунъя паньёртӧй ёна ошкис выль директорсӧ, зэв пӧ зіль морт. Тшӧктіс сыкӧд кыдзкӧ йитчыны компьютеръяс кузя...
 
Вои лабораторияӧ 10 час кежлӧ (кор сёрнитчылім аддзысьлыны удмурт нывъяскӧд), а сэні Ондре лекция нин лыддьӧ налы. Водзджык локтісны да. Гӧгӧрвоӧдіс нывкаяслы, кыдзи уджалӧ удмурт HunSpell, кутшӧм сэні тырмытӧмторъяс. Гӧстяяс дырйи заводитіс вӧчны FineReader-лы удмурт кыв база. Сэсся менам пызан дорӧ вешйисны да, петкӧдлі нылашъёслы кыдзи ми уджалам: сканералам, пелькӧдам сканъяс, тексталам, спеллералам. Велӧдышті уджавны AntConc программаӧн.

Сэсся баитчим тадзи: вола Ижкарӧ вежон мысти Пермистика кадӧ да пырала на дорӧ небӧгаинӧ да универӧ - ставсӧ нин пыр-поч валэкто. Ондреӧс кори жӧ тшӧтш ветлыны да оз окотит. Ёшкаасьны на кутас, кӧнкӧ, гажлунъяс помӧдз.

Луннас миянӧс ёна нимкодьмӧдісны кодзувсаяс - журнал номеръяссӧ ставнас базааным сетісны да. Ӧні коми кыв корпус тӧдчымӧн озырмас. Аски-аскомысь лоӧ видзӧдны, кыдзи позьӧ интегрируйтны налысь материал. 

Кодзулаинас жӧ "Коми муса" компьютерщиксянь тӧді, коми раскладкаыд овмӧдчӧма тай вӧлись нёльӧд судтаас! Кык да джын во мысти...

А ачым лунтыр содті Ӧльӧш Ваньлысь текстъяссӧ сайтӧ. Но и маета, но и нокыс! Зато сэсся 1979ʼ вося небӧгсьыс ӧти юкӧн дзоньнас нин ӧтуввезйын: библиография (ыстӧгъясӧн) - лаборатория сайтын, текстъясыс - кыв сектор сайтын.

Рытнас Ондре мӧдіс козаньса автобусӧн Ёшкалань. Асывнас на скриптавны лэдзӧм удмурт базасӧ ӧдва удитіс помавны мунтӧдзыс. Аски кӧсйысис мӧдӧдны мем ӧтуввез пыр.

Татшӧма коли пекнича да и официальнӧя уджалан вежон. Аски субӧтася ӧтнам.

Секция +

Чудьлунсӧ сиим ставрочмувывса конференциялы, кӧні тай Микол Ӧльӧшыд воӧн-джынйӧн нин секретаралӧ. Асывбыд мӧвпалі, мыйджык кута сёрнитны корпус йылысь. Сэсся час-мӧд лӧсьӧді скриншотъяс. КЛИИ-ын компьютеръяс важӧсь да коми шыпасъяс кӧнкӧ оз мися и петны дисплеяс...  jpg-ӧн кӧть кӧні петасны тай...

Удмурт кыв туялысь Ольга Титова

Секциянымӧс пажынбӧрса кадӧ восьтісны Войвыв институтас, коймӧд судтаӧ. Ондрекӧд ӧтлаын ветлім. Предаліс проф. Кельмаков. Медводз сёрнитісны удмурт ёртъясӧй : Ившин Лёня висьталіс важ кигижӧдъяс йылысь, Титова Оли - выль кывкудъяс йылысь, тӧдтӧм Камитова А. В. - удмурт орд пасъяс йылысь. Сэсся сыктывкарса Понарядов Вадим историяводзвывса шума шыяс реконструируйтіс. Брейк бӧрын менам черӧд вӧлі да сёрмӧдчи, слабог Наташа Кондратьева мездіс - юӧртіс билингвизмкӧд йитӧдын челядь психология йылысь. Ачым сэсся час чӧж висьтаси миян корпус кузя. Ёнакодь юасисны - тыдалӧ интересуйтӧ жӧ тайӧ тема туялысьястӧ.  Помаліс секциясӧ Марья Плоскова, италмаснӧй горшлун вылӧ элясис жӧ да.

Уджтас серти кӧ сӧмын джын мында йӧзыс пырӧдчисны секция уджӧ. Сійӧн водзджык помалім да сэсся часысь дырджык пукалім фойеын. Сы коста тӧдмаси ижкарса мичаник нывкӧд, Аня нима, коді тай ме бӧрын Гёттингенын велӧдіс, а ӧні Удмурт Элькунса нац. небӧгаинын мыйкӧ юралӧ. Казьтыштім уна тӧдса немечьясӧс, тшӧтш проф. Винклерӧс да Бартенс гозъясӧ бур кывйӧн. Зэв интереснӧ вӧлі тӧдны, кодарӧ сэтчӧс олӧм сӧвмис сы бӧрын, кор ме муні...

Рытнас вӧлі, кыдзи тай шуӧны удмуртъяс - юондыр. Банкетасим час кык. Удмуртъяс кыдз и пыр сьывтӧг эз овны. А ми рытывбыд варовитім важ тӧдсаӧйкӧд - Наташкӧд. Сійӧ ӧнісӧ деканалӧ универаныс, а коркӧ Туркуын ӧтлаын джын во тусуйтчим...

Удмурт нывъяс ӧтсӧгласӧн корӧны Ижкарӧ - Пермистикаӧ быттьӧкӧ, ыджыд блатӧн кӧсйӧны пыртны волысьяс лыдӧ, дед-лайнныс эськӧ тӧлысь сайын нин вӧлі-а. Колӧкӧ ветла жӧ йирым помын. Ышӧда ставнысӧ босьтчыны вӧлись удмурт корпус лӧсьӧдны. А аски локтасны миянӧ антконк программаӧн тӧдмасьны.

Вой кежлӧ водзӧ уджалі Ӧльӧш Вань гижӧдъясӧн да мыйтакӧ кывбурсӧ содтӧд пукті сайтӧ... Ондре ӧтарӧ кынмӧ - гортӧ, лунланьӧ бара нуӧдчӧ... Шоныд пасьла пӧ...

Ёгор Миш - 200

Тайӧ арся шӧрлуныс тӧд вылӧ медводз пуксис медводдзаысь усьӧм лымнас. Муыд уналаті шебрасьӧма еджыд эшкыннас да. Эськӧ и ӧти войколӧн сёрӧнджык Пӧкрӧвысся. 

Лаборанталі талун унджыксӧ Куратов гижӧдъясӧн. Нӧшта ӧтчыд вежӧрті - научнӧя дасьтӧм текстъясыд абу быть медся бурӧсь мичлун боксяньыс. Заводиті пуктыны Ӧльӧш Ваньлысь кывбуръяссӧ сайтӧ.

Ондре вӧлись помаліс тыва кывкудсӧ да лэдзис сійӧс ӧтуввезйӧ. Куим вой абу узьлӧма мортыд - и вӧчӧма таки вӧвлытӧмтор. Ӧні кӧрт туйтӧм тываяслӧн эм асланыс электрон кывкуд!

Узьысь красавичаным талун сизим час чӧж уджаліс миянын да помаліс вӧлисти "Коми йӧзкостса эпос". Зӧвсьӧрт рулитӧ! Сэсся тайӧ небӧгыс выйим нин pdf форматын. Кодлы колӧ - босьтӧй!

Скӧрӧдумса Наташ вайис тексталӧмсӧ: Юшковлысь повесьтъяссӧ, Тиминлысь "Ракетасӧ" да Напалковлысь "Радейтӧмсӧ", босьтіс уджӧ Одинцовӧс ставнас да Лыюровлысь "Водзын любовсӧ". Дзик нин вӧйис уджйӧзӧ нылыд банкъяслы. Мездысьны мися колӧ регыдджык сьӧмсьыд, воӧ кӧ нин киад. Сьӧмысла став лёктор... Бурджык мися кывбуръястӧ гиж - сьӧлӧмпӧт кӧть лоас!

Рытнас лӧсьӧдыштім Палэзиккӧд Толь Геньлысь сьыланкыв удмурт ногӧн. Лӧсьыда бӧръяпом артмис - "Шунды шудэ Эжва шурын..."

Талун кыпыда пасйим Ёгор Мишыслы 200 арӧс. Юим сы понда кода пувва да комиӧдім медся тӧдса кывбурсӧ. Со сійӧ:

Коль видза, мыськытӧм Роч муӧй,
Вер видзан вермысьяслӧн му,
Куш кельыдлӧз мундир кӧн туӧ,
А йӧзыд паныд нем оз шу.

Ен тӧдӧ, гашкӧ Кавказ лёддзыс
Саёвтас менӧ понъяссьыд,
Быдтортӧ синйысь синъяс водзысь
Да лёкӧн лякысь вомъяссьыд.

Пӧкрӧв лун

Мича лун вӧлі талун, эськӧ и кӧдзыд. Нёль чут кӧдзыд петкӧдліс шӧр стадионводзвывса часіыд, асывнас сы водзті котӧртігам.

Талун воторник да, велӧдан лун. Ветлі университетӧдз. Витӧд судтаса жырйын компьютеръясӧ пуктӧма вӧлі коми раскладка! Но асланым вики сайтӧдз вермим воӧдчыны сӧмын ӧти компсянь. Волісны квайтӧн. Видлі бара ышӧдны студентъястӧ блог лӧсьӧдны, а челядьлӧн бур отмазка - миян пӧ ноутъяс жугалӧмаӧсь. Ставлӧн ӧттшӧтш! Ёна и ас кежысь сералі. Шуи, Ондрелы мися вайӧ ассьыныд жугъяснытӧ, здукӧн дзоньталас. Урок чӧж зіли гӧгӧрвоны, кутшӧмджык практика бӧръясны. Помланяс сувтчисны тексталан уджӧ. Кутасны волыны лабораторияӧ да текставны коми небӧгъяс. Вась Лена найӧс вывті жалитӧ. Вит листбок луннас пӧ мед лоас норма жебиник челядьлы... А коймӧд курс ӧд, самӧй кыпыда колӧ эськӧ том йӧзыслы кӧть кутшӧм уджӧ босьтчавны...

Пажын бӧрын муртса пырӧдчи аслам уджӧ, Микол Ӧльӧш  телефоналӧ - конференция котырӧ дзик ӧні жӧ пӧ регистрируйтчыны лок. Ветлі КЛИИ-ӧдз. Регистрируйті куимнаннымӧс. Йӧзыс воалӧны нин - якутъяс, шуам, тані нин... Ӧти сайын баитышті Фольклор Юлякӧд сайт кузя - кӧсйысис во помӧдзыс кыпӧдны сёрни сектораныс, медым коми фольклорысь небӧгъяс тшӧтш позис пуктыны komikyv.com сайтӧ.

Рытнас коставлӧмъясӧн уджалі Ӧльӧш Вань медшӧр небӧгӧн, вайӧді сійӧс пдф-ӧдз. 1979ʼ вося "Менам музаыслы" юриндалысь сэсся судзана ӧтуввез пыр: со татысь. Аски пуктала интернетӧ и текстъяссӧ. Тешкодь, мый ӧнӧдз найӧ сэн абуӧсь на - бара кӧнкӧ грантъястӧ виччысьӧны.

Ужнайттӧдзным Ондре да Лы Тун пасйисны Пӧкрӧв лун. Сэсся кӧнкӧ и кыйсьыны мунасны, вӧрысь петавлытӧг... Пӧкрӧвасьӧм костіныс ачым гуляйтышті пӧнаръяса карӧдыс. Вӧчи кытш - первой лэччи Виттор театрсянь Бабушкин туйті, сэсся Ленин туй пӧлӧн кайи войвывлань, кежи Печӧра туй вылӧ да бӧр локті Печать керкаӧдз Карл Маркс туй кузя.  Аддзылі татшӧм мичатор:

Вои кывкӧртӧдӧ, колӧ мися тшӧкыдджыка шывкъявны картіыд, торйӧн кӧ пемдӧм бӧрын. Рытъя ветлӧдлӧм быд боксянь зэв бур - мичаторъяс аддзӧмысь, уджсьыд шойччӧмысь да ас дзоньвидзалун ёнмӧдӧмысь кындзи унатор на тӧдмалан и йӧз йылысь. Рӧмыд кадӧ тай бурджыка кылан мортсӧ, эськӧ синъясыс озджык тыдавны-а.

Но синъяс, пӧкрӧвъяс да мукӧд психологияса моментъяс йывсьыд мукӧд коми блогйысьяс гижлісны нин...  Дай нӧшта на тӧдӧмысь уна пӧв гижласны. Ачым тай коминас ёнасӧ ог куж... Со витӧд нин буракӧ вой Ли Ботӧ мырся комиӧдыштны, мед лӧсьыдджыка кылас. То мӧвп, то пертас "чотӧ". Талун со татшӧмӧн петіс:

Кыр йыв ен колаын войков,

Кодзувъяс - соддзад кӧть кисьт.

Эськӧ и кыв джынйӧн торкны

Енэжлысь чӧвлун ог лысьт.

Кызь во сайӧ лэччылі

Талун бара нокси Ӧдя Вась гижӧдъясӧн. Слӧйми буретш канму киссян кадся небӧгъястӧ лыддьыны. Бара быттьӧ сэкся олӧм син водзӧ пуксис...

"Чибльӧгысла" ветлі библиотекаӧ, кӧні виччысянаа аддзысьлі Тувсовъякӧд да Зарни Люсякӧд и дзик виччысьтӧг паныдасьлі Тусьыдкӧд. Мӧдыс шензис быдсӧн, менӧ медводдзаысь компьютертӧг аддзыліс да. Талун интервьюасьӧ. Регыд колӧкӧ и радиопередача лэдзасны коми блогъясьӧм йылысь. Вой кежлӧ восьтім Женюкыскӧд контактӧ Коми блогйысь группа.

Мукӧд лоӧмторъясысь:

• Йӧлгиньӧс регистрируйтім Овлуса конференция котырӧ, ачым бара эг удит...
• Дасьті отчёт узьысь красавичаяс кузя. Мыйтакӧ отсалісны жӧ коми небӧгъяс нэммӧдӧмын. Шуам налы тшӧтш аттьӧ!
• Лӧсьӧдчам Ондрекӧд чудьлунся конференция кежлӧ, кутам сёрнитны коми кыв корпус йылысь.
• Вомынса тексталіс В. Напалковлысь "Чолӧм и прӧщай", кутчис "Эзысь пернаӧ".
• Лы Тун бара дузъялӧ кадакыв да эмакыв вылӧ. Тшыкӧдінныд пӧ коми кывтӧ мисьтӧм кывъяснас.
• Кола Микулайлысь рытнас юалі, мый мися Лена союзничаным вӧчӧ. "Блогтӧ гижӧ", - шмонитіс суседным.

И бӧръяпом, традиция серти китайса поэт Ли Бо кывбурлы выль коми вариант (серпас вылысь кодзувъясыд озджык тыдавны эськӧ-а):

Войковта кыр йылас эновтӧм колаӧ,

Кодзула енэжӧдз - ки лэпты дай.

Кевмысьны эськӧ-а, шызьӧдны пола ме

Мувывса шыясӧн чӧв енэжсай.

Чизыр тӧв

Талун тӧрыт моз жӧ уджалі Ӧдя Вась текстъяснас. Кывбуръяссӧ лунтыр лыдди да ачым нин быттьӧ ола поэтыслысь олӧмсӧ да сёрнита сы кывйӧн. Уджъёртӧй ас пайысь тыва кывкудсӧ водзӧ бурмӧдіс. Тадзи лун и коли.

Ужнайтнысӧ ветлігӧн рытъя пемыд пыр казялім жӧ: ва гӧпъяс тай йизьӧмаӧсь. Чизыр тӧвйыд ас йылысь казьтыштіс и. А ми век на кокни паськӧмаӧсь. Кад нин мися тӧвся пасьысла да гынкӧмысла ветлыны. Ондре та йылысь жӧ вӧлӧм мӧвпалӧ. Миян тай став кӧлуйным гортладоръясын куйлӧ, ылі лунвылас. Сэтчӧясӧ гашкӧ и ковмас лэччыны локтан вежон, конференцияас петкӧдчам да.

Китайса кывбур, войдӧрлунся версиянас, уналы эз кажитчы да, вӧзъя выльӧс - тэчас сертиыс дзик нин китайса оригиналыдлы матынӧс:

Вой, кыр йыв, ен дор.

Кодзув - юр выв тыр.

Дзик нем тор ог кор.

Овны кӧ тан пыр…

Ӧти сайын - ачыс оригинал :

Вӧй лов кав пай тши,

Шов кӧ джай син тшӧнь.

Пу кань кав шӧн йи,

Кун тин тйӧнь шан жӧнь.

Ӧдя Вась

Грекӧвӧйтчим бара талун, кык пӧрысь йӧврӧй - уджалім субӧтабыд. Уджъёртӧй тывасӧ мыркис, ачым Ӧдя Васьсӧ нэммӧді. Медводз вӧчи Габовса небӧгъясыслы пӧшти тыр библиография. Та дырйи гӧгӧрвои, колӧ мися тырвыйӧ вежны структура небӧг гижалӧмыслы. Торйӧді ӧткымын блок татшӧм артӧн: аннотация - индексъяс - небӧг вӧчысьяс - личкӧдлан параметръяс - копирайт юӧр. Но и юриндалысьыс. Лои со тадзи кымын.

Ӧдя Васьлӧн ставнас дас ӧти небӧг. На пӧвстын нёльыс - челядьлы вӧчӧм морта нигаяс, квайтыс - кывбур чукӧръяс да ӧтиыс - проза. Сӧмын "Чибльӧг" талун ки улын абу - коркӧ тай сӧмын текст сетлісны небӧг лэдзысьяс, пдфкатӧг. Сійӧн выльлунӧдз олыштас на. Став мукӧд небӧг миян викианым гижалӧма зэв нин бура.

Пемдандор заводиті текставны кулӧмдінса поэтыслысь нигаяссӧ. Ӧні коймӧдсӧ нин лыддя. Бӧръя куимыс эм нин. Сідзкӧ аски кежлӧ кольӧны витӧн...

Луннас воліс нӧшта ӧти выль отсасьысьным - Визинса Юля. Комиӧн сідзсӧ оз сёрнит-а, быдторсӧ гӧгӧрвоӧ жӧ. Нылыд кужӧ сканируйтчыны, сканер гортын эм и. Ӧні буретш гортын пукалӧ. Сеті сылы сканеравны "Тундраса бияс" воддза петасъясӧн да нӧшта небӧг-мӧд. Важӧн ог слӧймӧдчы найӧс PDF-авны. Лача кута, Юляыдлӧн артмас да, водзӧ кутас эл. небӧгъяс пӧжавны. А тадзикӧн и менам унджык кад коляс мӧд сикас удж вылӧ.

Локтан вежон КНЦ-чилӧн лоас конференция - филологъяс кутасны сёрнитны куимлаын: томъяс торйӧн соборуйтасны, литература туялысьяс ас кежысь кодрыштасны Ӧльӧш Ваньӧс, лингвистъясыд бара - Гриш Геньӧс. И. А. Куратов да Г. Г. Бараксанов гӧгрӧс пасаӧсь да. Чукӧртчыласны туялысьяс Рочму пасьталаысь. Видзӧдам, мый шогмас. Пукті жӧ юӧрсӧ komikyv.com сайтӧ.

И бӧръяпом: бур юӧр коми блогосфераысь. Куим Ю воссисны вӧлись - эськӧ йизян дыр нин-а. Быдса куим гижӧд талун пуктӧма Ленукыд блогас. И весиг ӧти кывбур, пузчужӧмсӧ. Медводдза лымлы сиӧмӧс. Бур туй куимнан юлы!!! Мед содӧны да туӧны тӧвсӧ сералігтыр.

Ли Бо 2

Еджыд гутъяс эськӧ бара  лэбалӧны-а, талун Ондрекӧд тӧдчымӧн гажаджыка олім. Йӧзаӧсь лоим да!

Ӧт-кӧ - лунтыр велӧдім выль отсасьысьнымӧс, Верукӧс. Сійӧ кутас миян текставны небӧгъяс. Радейтӧ пӧ коми кыв, лача кутам тадзи и эм.  Сетім нывкалы Изъюр Иванӧс лыддьыны, кӧть сійӧ  озджык и тӧд, коді сійӧ сэтшӧмыс. Шуим пыдіа тӧдмӧдны сійӧс коми литератураӧн. Ӧд коми филологлы быть бура тӧдны коми гижысьясӧс да налысь гижӧдъяснысӧ.

Мӧд-кӧ, Тусюкыд воліс босьтны интервью блогъяс кузя. Ме сёрнитнысӧ ог куж да ӧдва-ӧдва мыйкӧ пычки ас пытшкысь. Гашкӧ мукӧд блогйысьыд унджык сярзясны да, КНР-ас мичаджыка юргас блогъясьӧм йылысь уджтасныс.

Коймӧд-кӧ, Кӧжмудорса вайис роча-комиа кывкудйысь Ш да Щ шыпасъяса юкӧн. Удитіс интегрируйтны текстъяс. Сэсся босьтіс уджас С шыпас.  Зэв зіля уджалӧ. Кӧть и театрасьӧ кызвыйӧ. Шуліс, тӧрыт пӧ весиг актёръяс эз тӧдны, кыдзи ревизорыс помасяс...

Пажын бӧрын кайлі Катюша дорӧ. Сійӧ кӧсйӧ водзӧ отсасьны миянлы, чоюкыскӧд тшӧтш библиографияяс вӧчны. Зэв нимкодь, кор йӧзыс коми кыв сӧвмӧдӧм могысь кӧсйӧны уджавны.

Забыль, бара кутісны йӧзыс блогйыны: Тувсовъя и, Тусь и, Ӧльӧшыд и, Кола и содтісны блогъясаныс выль гижӧдъяс.. Чайта, сэсся дырӧн коставлытӧг кутасны пасйысьлыны, коми блогосфера паськӧдны.

Тӧрыт  войнас Вомынса здукӧн журӧдіс менӧ гортӧдз ас машинаӧн. Векджык войяснас подӧн ветла да, зэв нимкодь вӧлі зэр увтті келӧм пыдди косӧн гортӧ воӧдчыны. 

Гортын  бара видзӧдлі Ли Бо кывбур вылӧ да шуи лӧсьӧдны мӧд вариант, китайса форма дорӧ матысджыкӧс. Со тадзи артмис:

Вой, гӧра йыв, ен кола.

Ола кодзула пӧлын.

Ас гора кылысь пола,

Кыла енкӧла чӧлӧм.

危楼高百尺，

手可摘星辰。

不敢高声语， 

恐惊天上人。

Инкогнито

Пажынӧдз удиті дасьтыны да мыйтакӧ пуктыны ӧтуввезйӧ В. Г. Лодыгин небӧгъяс кузя инфа. Муртса на мӧдім сёйны, пырис выль отсасьысьным - Вера. Университетын велӧдчӧ филологӧ. Кык час чӧж петкӧдлі сылы, мый миян вӧчӧма коми кыв кузя. Вӧлӧмкӧ налӧн курс нинӧм оз тӧдны ни эл. кывкудъяс, ни коми раскладка - нинӧм. Сорокинъяс век на олӧны, кык кывйӧн кӧ шуны, из нэмын... Пукті нывкалы  ноутас программаяс и кори аски матыстчыны конкретнӧй уджла.

Витланяс нин ветлім Ондрекӧд пажнайтны сюръяӧдз. Нуръясигмоз талун медсясӧ ОС казьтывлім. Эмӧсь пӧ виндузятникъяс, эмӧсь линуксоидъяс. А кодъяс мися Apple-ӧн вӧдитчысьяс? Зумыд зонъяс налы нимыс - вочавидзис уджъёртӧй.

Кӧжмудорса тӧрыт на корис видзӧдны выль коми спектак да, рытнас ветлі Шылада-драмаа театрӧ. Сезоныс буретш талун пансис, сійӧн медводз вӧлі официоз - ставыс рочӧн бара. Лӧг петӧ, оз вермыны некыдз коминас да. А сэсся ворсісны, слабог комиӧн. Ревизорӧс, выль интерпретацияын - Питеркарысь инкогнито. Роч чинушаяс залын пукалісны, а найӧс зэв лёка сералісны сцена вывсянь. Кырыма Рочму карта вӧлі фонӧн, а карта шӧрын - тӧвзьысь куима вӧв. И помланяс, каркутысьлӧн монологас гарыштӧма жӧ вӧлі: татшӧм пӧ тэ и эм - Рочму. Жаль, стенмӧ абу лысьтӧмаӧсь ӧшӧдны ӧнія сарлысь портрет. А сідзсӧ ворсӧмныс вӧлі зэв эскӧдана, мичаа сьылісны и. Медся тешкодь дерт пом, кор збыльнӧй ревизор пыдди кывтӧммӧм йӧз водзӧ прокурор паськӧма петкӧдчис ачыс режиссёр-пӧч.

Театрсянь войся кар кузя зэр пыр мунім мӧд Арсякӧд. Варовитім гижан удж йылысь... Дыш мед оз сёй кыкнаннымӧс, колӧ мися мыйкӧ миянлы ӧтув гижны. Со мукӧдыс вермисны тай кык ютӧ лӧсьӧдны-а... Гашкӧ и миян мый артмас... Дасланяс бӧр лабораторияӧ локті да сэсся вой шӧрӧдз сканераси.

Ли Бо

Лун коли. И нинӧм эз вӧв. Нинӧм!!! Лунтыр сійӧс и вӧчи - юкалі да тшӧтшӧдлі сканъястӧ. Тӧдсаясысь гашкӧ сӧмын Лы Тун да Кола Микулай пыралісны. Гажтӧмӧсь жӧ талун. Мый и керан - кадтӧмлун... Сьӧд ар. А мый лоас аски...

Вой кежлӧ тӧд вылӧ уси китайса томлунӧй да, сы сорӧн юрӧ воис Ли Болӧн ӧти кывбур... Сійӧс и йӧзӧда татчӧ, мед кӧть места тырыштас:

Ен Из йылӧ кыпӧдчи, узьмӧдча эновтӧм крамӧ.
Ки нюжӧда выліас - кодзувъяс сюрасны скӧнь...
Но весиг и шыасьны полышта... Видзӧда рама,
Кыдз енэжын олысьяс видзӧны нэмӧвӧй лӧнь.

Рохир ёрт

Воторникасим талун шӧркодя. Поводдяыс оз гажӧд да, абу кыпыд руаӧсь ми. Жугыль синмӧн видзӧдам таладор олӧм вылӧ. Но и ёна дзугыльтчынытӧ помка абу жӧ уна.

Олӧмыд - ворсантор

Талунъя вӧчӧмын ворсісны:

1. Ондре - уджъёрт
   
2. Марина - босс
   
3. Игушев ёрт - профессор
   
4. Кана ёрт - Doktorvater
5. Лы Тун - Кодзув кутысь.
   
6. Микулай дядь - коркӧя керкавидзысь
7. Полковник ёрт - ӧнія керкавидзысь

Вӧчӧма:

Важ русь кылӧн

Вӧлись выльмӧдім коми орфография модуль. Мӧймуся ӧшымсянь нинӧм эгӧ вӧчӧ та кузяыс. Ӧтарӧ текстъястӧ чукӧртлім. Тӧрыт да талун лун джын содталі модуль базаӧ лексика, талунсӧ медсясӧ Ӧльӧш Поповлысь. Вежи спеллерсьыным мукӧд кӧсякъяс. Луннас иналім ӧтуввезйӧ. Ӧні асланым сайтын куйлӧ программа пуктан файлыс. Войдӧр Google хостингын ӧшаліс, но жугавлӧма мыйкӧ сэні.

Луннебӧг лыдди

Сьӧд ар. Тӧрыт эськӧ медводдзаысь лымъялыштӧма-а, абу на едждӧдӧма мусӧ. Ачым, бара, эг и аддзыв лым чиръястӧ, компьютер водзын уджалігмоз унатор тай кольӧ син саяд... Войнас бӧр гортӧ локтігам нинӧм сэтшӧмсӧ эг жӧ казяв. Пемыдсьыс, кок ув васьыс да чизыр тӧвсьыс кындзи ог тӧд нинӧм. Вой шӧр войын лои на ноксьыштны кӧзяйка ноутӧн. Воді узьны куим бӧрын нин да регыд и унмӧ уси .

Бара удж

Пекничаыс вӧлі кӧдзыд да шондітӧм. Рытладор зэрмис да сэсся и буситіс дугдывтӧг. Карса кыдзьяс пӧшти кортӧмӧсь нин. Пелысь розъяс вир войтъяс моз ӧшалӧны. Оз нин синтӧ шонтыны.

Вошлӧм плешка

Чудьлуныс кольӧ. Абу жӧ озыр вӧлі лоӧмторъясӧн, но мыйсюрӧ висьтавмӧн эмышт жӧ.

Мед олас КНР!

Вежон шӧр. Кӧдзыд. Лунтыр висьӧдчи да выльсӧ нинӧм эг и вӧч - важсӧ пелькӧдлі, коркӧя кӧсякъясӧс бырӧдалі. Чайта, колӧ збыль шойччыны кытчӧ мунны ли мый ли. Кусынтча ӧд, тадзикӧн кӧ водзӧ кута ӧтнам дас пыдди додьсӧ кыскыны. Вертепса, забыль, ӧдва ловъя жӧ, уджыс пӧ юр выв тыр - ловзьыштны некор.