Лунвылӧ лымла

Мукӧдыс ветлӧны саридз дорӧ шонділа, а Арсялӧн ставыс гугӧн да, лунвылӧ лымла талун мӧдіс.

Асывнас ветлі билетла. Кӧсъя мися лэбны Перымӧдз, эм абу талунъя рейс вылӧ мыйкӧяс. Кассирша видзӧдіс компас, шуӧ абу пӧ нинӧм. А аскиа рейснас кыдзи? Видзӧдліс - абу жӧ. А пекнича? Корсьысьыштіс, шуӧ, сӧмын пӧ вежалунся билет выйим... Но мися, вежалун мем сёр ни лоас, бергӧдчи нин мунны. Автобусӧн мися ковмас чушкыны. А бӧрсяньым: "Том морт, вай ме звӧнита-тӧдмала - гашкӧ кутшӧмкӧ броньтор коли жӧ..." Тӧдмаліс: ӧшалӧ пӧ ӧти бронь. Но стӧча пӧ кутам тӧдны, локтан кӧ кык час кежлӧ. Ладнӧ, мися.

Кык часланьын бара вои аэрокеркаӧ - мӧд ныв нин кассаын. Тадзи и тадзи мися. Абу на билетыд, шуӧ. Кызь минут виччыси - бара матыстча. Юалӧ, мый тэныд кӧсйысиснытӧ? Мися - броньтор пӧ довжӧн кольччыны... Звӧнитіс бара кытчӧкӧ, дыркодь телефонасис - и сюри жӧ! Билетаси да гортӧдз ӧтарӧ-мӧдарӧ тачкаӧн журӧбтылі - багаж босьтны.

Досмотрасим ыджыд майшӧгъястӧг, эськӧ мегыр пыр пыригмоз зёльӧдчи жӧ. Но лэдзисны - пертасӧй тыдалӧ надейнӧйӧн кажитчис. Медся тешкодь дерт самолётын - 18 инсьыс 4 прӧст. Сідзкӧ менам броньтор вӧлі вель на и зумыд. Барин моз ӧтнам пукалі кык креслӧын.

Кыпӧдчим Сыктыксянь да пыр и кымӧрӧ сюрим. Со тай сетіс мися вӧлись Енмыд мукӧд коми кывбур гижысьяслы моз кымӧръясті лэбалыштны. Кутшӧмкӧ фразаяс да мелодияяс кутісны бергавны юрын, рифмаясӧ тэчсьыны. Но ӧшинь сайын дыркодь нинӧм эз тыдав да, вугыр босьтіс.

Сэсся коркӧ палялі - енмӧй: гӧгӧр сӧстӧм, уна рӧма енэж, шондіыд енэжтас сайсянь медбӧръя югӧр нин ыстӧ. А улын - сваль кымӧра саридз. Кымӧра му веркӧс ли - аслас слудаясӧн и сёнъясӧн. И ставыс вӧляника вӧрӧ... Тадзи пивъя океан весьтӧдыс зэв дыр шлывгим. Нимкодясьны он мудзлы татшӧмторнас. Сюрреализм кодь мыйкӧ. Лисовскӧйыд татчӧ эз тырмы. Ачым вӧчи жӧ дзарпас-мӧд.

Кӧнкӧ сэн, кымӧра саридз улын, ойбыралӧ лымъя Перым му. Миян весьтын - сӧстӧм енэж. Шондіыд муртса на саймовтчис...

Перым дорӧ матыстчигӧн бара тювкнитім кымӧрӧ-руӧ. Буретш пемдӧ вӧлі. Но романтизмлӧн руыс ни пемыдыс эз нин вӧв тайӧ пӧрйӧ. Жувгисны ёна лэбӧг моторъяс да юрам ӧттшӧтш жувгыны кутіс, пельтӧммылі и. Пуксим слабог некытчӧ татшкысьтӧг...

А чужан карӧй и збыль лымъя нин вӧлі. Толаяс быдлаын. Кӧнсюрӧ ыджыд керӧсъясӧн нин пукалӧ лымйыд. Вештасьны транспортӧн сьӧкыд. Миян тай шуӧны татшӧмтор йылысь - уброд. Аэропортсянь трассаӧдз петігмоз 500 метра костсӧ автобус вуджис джын часӧн. Туйшӧныс тырӧма лёгкӧвикъясӧн, и мукӧд машина вешйӧны ылӧджык бокӧ да сибдӧны лымйӧ. Тадзи и миян bus. Бульдозер отсӧгӧн кыдзкӧ кыскисны жӧ. Сэсся кар кузя кык да джын час чӧж кыссим гортӧдзым. (Сыктывкарсянь Перымӧдз туйным часӧн-джынйӧна вӧлі-а). Тані вунӧдісны нин сьӧд мусӧ. Тӧв и тӧв. И шуӧны - кузя пӧ нюжалас сійӧ.

А гортын шоныд да лӧнь. Мый нӧшта колӧ таладор олӧмад???