Инкогнито

Пажынӧдз удиті дасьтыны да мыйтакӧ пуктыны ӧтуввезйӧ В. Г. Лодыгин небӧгъяс кузя инфа. Муртса на мӧдім сёйны, пырис выль отсасьысьным - Вера. Университетын велӧдчӧ филологӧ. Кык час чӧж петкӧдлі сылы, мый миян вӧчӧма коми кыв кузя. Вӧлӧмкӧ налӧн курс нинӧм оз тӧдны ни эл. кывкудъяс, ни коми раскладка - нинӧм. Сорокинъяс век на олӧны, кык кывйӧн кӧ шуны, из нэмын... Пукті нывкалы  ноутас программаяс и кори аски матыстчыны конкретнӧй уджла.

Витланяс нин ветлім Ондрекӧд пажнайтны сюръяӧдз. Нуръясигмоз талун медсясӧ ОС казьтывлім. Эмӧсь пӧ виндузятникъяс, эмӧсь линуксоидъяс. А кодъяс мися Apple-ӧн вӧдитчысьяс? Зумыд зонъяс налы нимыс - вочавидзис уджъёртӧй.

Кӧжмудорса тӧрыт на корис видзӧдны выль коми спектак да, рытнас ветлі Шылада-драмаа театрӧ. Сезоныс буретш талун пансис, сійӧн медводз вӧлі официоз - ставыс рочӧн бара. Лӧг петӧ, оз вермыны некыдз коминас да. А сэсся ворсісны, слабог комиӧн. Ревизорӧс, выль интерпретацияын - Питеркарысь инкогнито. Роч чинушаяс залын пукалісны, а найӧс зэв лёка сералісны сцена вывсянь. Кырыма Рочму карта вӧлі фонӧн, а карта шӧрын - тӧвзьысь куима вӧв. И помланяс, каркутысьлӧн монологас гарыштӧма жӧ вӧлі: татшӧм пӧ тэ и эм - Рочму. Жаль, стенмӧ абу лысьтӧмаӧсь ӧшӧдны ӧнія сарлысь портрет. А сідзсӧ ворсӧмныс вӧлі зэв эскӧдана, мичаа сьылісны и. Медся тешкодь дерт пом, кор збыльнӧй ревизор пыдди кывтӧммӧм йӧз водзӧ прокурор паськӧма петкӧдчис ачыс режиссёр-пӧч.

Театрсянь войся кар кузя зэр пыр мунім мӧд Арсякӧд. Варовитім гижан удж йылысь... Дыш мед оз сёй кыкнаннымӧс, колӧ мися мыйкӧ миянлы ӧтув гижны. Со мукӧдыс вермисны тай кык ютӧ лӧсьӧдны-а... Гашкӧ и миян мый артмас... Дасланяс бӧр лабораторияӧ локті да сэсся вой шӧрӧдз сканераси.