Бырӧм кӧм

Асывнас лои водз чеччыны - талун пуктісны пара университетын. Колӧ пӧ комп. технологияясӧн тӧдмӧдны студентъясӧс. Ывлаас ХХІ нэм да. Ветлім Маринакӧд. Урок вылӧ локтіс куим ныв. Дисциплина дерт Сорокинъяслӧн кӧртӧвӧй! Интернет оз уджав. Компъясын хрюшаяс. Коми раскладка дук абу. Сы пыдди пукалӧ узбекскӧй. Азиатъяс пӧ велӧдчӧны медшӧр коми вузас тӧдчымӧн унджык комияс серти...

Выль лун

Шойччан лунъяс бӧрын выль вежон заводитчис зэв кыпыда. Ывлаыс ыркыд. Выльлун да, кыдз и пыр, помка лои томмыштны - бритчыны, мыссьыны, шырсьыны. Ӧти сайын и пажнайтны. Сійӧн локті уджавны лун шӧрланьыс. Пыри, а керкавидзысь, полковник талун, меным юӧртӧ, тіян пӧ волысьяс нин. Абу аслам сідзсӧ, а веськӧдлысьлӧн. Ачыс абу жӧ, сӧвещайтчӧ.  Ондре гуляйтӧ жӧ...

Зэра шылад

Вӧлись час Х и локтіс. Ёнакодь кӧдздӧдіс. А луннас и зэрмис. Сэсся кутам виччысьны тӧв пуксьӧм.

Лунтыр некодӧс эг аддзыв, пукалі лабораторияын да нокси ӧнія коми поэзияӧн. Кӧть и ӧнія поэзия кузя менам зэв ыджыд юалӧмъяс... Сканералі да тексталі ӧти-мӧдісӧ. Сэсся базаынӧсь. Рытнас Баяр ыстіс ассьыс библиография да зэв колоритнӧй фото. Пукті викианым.

Ыстӧг серти тӧді, кувсьӧма пӧ тайӧ вежон Яак Йоала, эст сьылысь. Быдмигам мортыс вӧлі сӧвет эстрадаса кодзув. Сэсся эг кывзывлы сылысь сьылӧмсӧ 25 воысь дырджык. А ӧд коркӧя романтика. Тыдалӧ, йиджис жӧ вирам ас кадӧ. Видзӧді-кывзі талун ютюбысь "Бӧрйыла шылад..." нима сьылан, 1979ʼ вося концертын гижӧмсӧ. Зэв и тӧдса серпасъяс ловзисны тӧд вылам, зэв пыді сьӧлӧмысь вӧрзьӧдіс лапӧдъяс сьылӧмыс. Сэтчӧ, сьӧлӧм пытшкас гижӧма вӧлі коркӧ мыла гор да вунӧма сэсся, тшук ӧні воссис. А ӧттшӧтш и зэрмис ӧшинь саяс. Меланхолия, дженьыда кӧ, дульче мелодия. Кӧть и рочӧн. Югыдін да шоныдін тэныд, Яг Йӧла! Aitäh, эст вок!

Бара югыд

Коді нӧ мудзас нимкодясьны зарни арнас, Ӧльӧш! Луннас кӧть войнас ӧтмоза синтӧ малалӧ да сьӧлӧмтӧ личӧдӧ. Козьналіс тай Енмыд! Лышкыда. Татшӧм здукъясӧ, ло кӧть кутшӧм пессимистӧн, кӧсъян мыйлакӧ эскыны: олӧмыдлы тай абу на пом...

ЛитоАртасигӧн

Вежон чӧж зэртӧм да мича!!! Пекнича нин кольӧ... Со и эскы туналысьяслы...

Лунтыр нокси Микит Нина гижӧдъясӧн. Кор и сигӧртча?! Забыль, кебраса аньыд тшӧтш пайсӧ пуктӧма коми гижӧд кывтӧ косявлӧмӧ... Бӧръя небӧгъясас диалектса гижанногыс чулькйӧн нин пуӧ да... Но коми кывсӧ коми гижысьяс киӧн пазӧдӧм йылысь колӧ торйӧн сёрнитны...

Пекнича forever!

Талунъя лоӧмторъясысь:

1. Сідз шусяна таллинсаяс велалісны лыдпасъяссӧ лыд нимъясӧ пӧртны. Ондре тшӧтш сэсся кужӧ - ворсантор кодь мыйкӧ артмис.  OAHPA!

Коймӧд ю?

Кок ув зарни

Талун некытчӧ эг и ветлы. Печать керкаын лун и коллялі. Буди нёльӧд судтаӧдз кайлі видзӧдны, кыдзи олӧны-вылӧны коми мусаяс. Олӧны тай. Выль юралысьӧн. Но ёнасӧ нинӧм абу на и вежсьӧма... Выліас бара интересуйтчи офице-рыс / офицер-ыс майшӧгӧн. Нӧшта ӧти корректор сюри да. Аньыс тшӧтш шуӧ, слогалӧмӧн пӧ колӧ юкны кості лэччӧдігад.

Шӧйтан лун

Югыд шонді. Мича ывла. Ышмӧдан кос поводдя. Пыдӧстӧм енэж. Уна рӧма кор. Гожся кодь виж на турун...

А мудзим мыйкӧ ми Ондрекӧд уджавны. Эськӧ ставӧн зільӧны миянӧс ышӧдны, зарни гӧраяс кӧсйӧны да маа юяс. А со тай - джӧмдіс уджыд. Висьӧдчам и. Кынмалім, гӧжӧм ракаяс.

Мед эськӧ...

Пӧчӧ гожӧм бара караным. Тайӧ пӧрйӧ ӧттшӧтш зарни арыскӧд. Шоныд. Лӧнь. Шуӧны тай, лун кык пӧ нӧшта чеченитас. Сэсся пом. Арыд лоас сьӧд... Пелыся во да, Микол Ӧльӧш серти кӧ, и тӧв пуксяс кӧдзыд да вира...

А ӧні ывлаыд зэв на шань да мелі, олӧмыд тырӧма ёртлун гажӧн да муслун руӧн.  Мед эськӧ нюжалас татшӧми век-а!

Дышлун

Интервьюасигӧн менсьым пыр юалӧны, мыйджык пӧ тэ вӧчан прӧст кадӧ. Воча кыв овлӧ дерт ӧти - уджаладжык. Ставӧн шемӧс. Кыдзи нӧ пӧ тэ он мудз шойччытӧгыд.  Оз быттьӧ гӧгӧрвоны - ӧт-кӧ, мудзла, а мӧд-кӧ: уджавнытӧ позьӧ зіля, а позьӧ и дышиника. 

Локальнӧй падмӧд

Талун унджыксӧ коми локальнас мырсим.  Локальыд - тайӧ компьютерас уджтас, код отсӧгӧн позьӧ пасйыны кутшӧмкӧ кыв вылын кад, мера, сьӧм да мый. Кор кутан вуджӧдны тайӧ кыв вылӧ интерфейс, медводз колӧ вӧчны локаль.

Ен тӧдӧ!

Вӧлись шоналыштіс талун. И дона печать керкаын сетісны шоныд. Буретш! А со ывлаыс шондітӧм. Луннас некымынысь зэрліс и. Зэрыштӧ и ӧні. Гажтӧм бара. Жарысла ли зэрысла — тӧдӧ сӧмын Ен.

Чудитчим

Чудитчам талун. Асывсянь Ондре чуймӧдіс - локті, а сійӧ комиӧдӧ нин линукс!!! Комп. терминъяс кывкуд отсӧгӧн. Вуджӧдіс пӧшти ставсӧ, кодируйтіс да пуктіс компьютерас. Зэв нимкодь вӧлі аддзыны дисплей вылысь коми кывъя меню.

Ска1ни1руйт1чи жӧ

Выль арся рыт. Ывлаыс важӧн кодь нин пемдӧма. Кӧдзыд. Вой тӧв да. Ӧтнам коли неважӧн на йӧза печать керкаӧ. Чуналан лӧнь. Керка видзысьыд коръя нин вӧтасьӧ. А ме со век на дзорга талунъя олӧмӧ да видла мыйкӧ лӧсьӧдны лунся пасйӧдъяс сямаӧс.

"Воторник"

Воторник. Татшӧм нимсӧ коми войтырыд сьӧлӧмсяньыс кӧсйӧ вежон мӧд луныслы. Мый татчӧ шуан? Vox populi - vox Dei...

Жугыль

Олан-вылан да мудзыштан жӧ коркӧ. Чурки-буди вежон сӧмын на заводитчӧ, а со быттьӧ став вынсӧ нин кыскӧма кутшӧмкӧ лёк вир. Дементоръяс ли гӧгӧр шуксьӧны, кузь тӧв ли нач нин матын...

Бӧрйысигтыр

Бӧрйысян лун. Роч му пасьтала. Ӧтувъя. Кыдзи и ачыс Роч муыд. Сідзсӧ, быд регионас ассьыныс бӧрйӧны. Натшальствотӧ. Кӧні мэртӧ, кӧні губернатортӧ, кӧні уезднӧй воеводаястӧ. А комияс со Кайзерӧс бӧрйӧны. И вермам на тшапа шуны, мый татшӧмыс сӧмын миян!

Гусьӧникӧн

Бӧрйысьӧмводзвывса чӧв-лӧнь талун да, став Коми муса йӧз моз тшӧтш чӧв усьлі, шы эг сетлы, кыв ни джын эг лэдзлы, гусьӧникӧн уджалі дай. Локті лабораторияӧ, пукси компьютер водзӧ дай редактируйті «Войвыв кодзувъяслысь» ӧтувъя юриндалысьсӧ. Рытъявылас ӧнія помӧдз вӧлись воӧдчи, 1960ʼ вося ӧшым тӧлысьӧдз. Сэсся виччыся, кор Катюшыд выль номеръяссӧ ваяс.

Лыддьӧг лӧсьӧдігӧн колӧ вӧлі кодарӧкӧ керсьыны — кыдзи пасъям циклъяс да журналса юкӧнъяс, журналса и ассьыным пасйӧдъяссӧ да м.д.

Дженьыд лун

Кадыс жаль тӧдтӧг матыстчӧ вой шӧрлань, а Арсяыд некыдз оз вермы чукӧртны визъялысь мӧвпъяссӧ, медым юӧртны urbi et orbi талунъя лоӧмторъяс йылысь. Вӧліны кӧ быттьӧ найӧ.

Юбилей паныд

Коми йӧз син водзса талунъя олӧмӧй заводитчис дай помасис пажынӧдз. Весиг, позьӧ шуны, 90 минутаӧ тӧрис.

Ӧти лолыштӧмӧн

Луныс коли кыдзкӧ казявтӧг, ӧтчыд лолыштӧмӧн. Шоныд талун вӧлі ывлаыс. Югыд и. Карас дак зэв и зэв лӧсьыд. Сиктын гашкӧ тшӧтш. Дырджык эськӧ Коми муад татшӧм поводдя пукалас-а...

Вӧйим уджӧ!

Нок, нок и нок! Асывбыд шӧриалі да тшӧтшалі сканералӧмсӧ (тундраса бияс, рӧдвуж пасъяс да мый да). Практикантъяс, тыдалӧ, оз нин удж бердӧ кутчысьны да, лоӧ аслым...

Гӧсьтъяс волісны

Ылі гӧсьтъяс воліны талун лабораторияӧ. Немеч профессор Герсон Клумпп да эст ныв, диссертация гижысь Триин Тодеск. Зэв нимкодь вӧлі тӧдмасьны.

Кӧть и бӧрдны туйӧ...

Со тай. Олі жӧ кыдзкӧ верман арӧдз. Бӧрд кӧть серав! Эськӧ перестройка дырйи на чиганка томиник зонкаыдлы 37-ӧдас бырны шулӧма. И збыльысь чайті дырджык не овны. А со ловъя на, да и мырся на мый вынысь. Оз ков быдпӧлӧс глобаяслы да вангаяслы эскыны! Ӧтарӧ пӧрйӧдлӧны найӧ бур йӧзтӧ. 

Пывсьытӧм пывсянлун

Субӧта талун. Коминад пывсянлун. Эськӧ коми радиоса Гулю Галя коркӧ ярскӧба шуис: оз лӧсяв пӧ татшӧм нимыс, ме пӧ выльлунъясӧ пывся да!

Помлуннас на шулім, енлуннас и. Кодсюрӧ и шойлуннас нимтыны вӧзйыліс. Но кыдзкӧ субӧтанад и коли. Шаббат да. Вермывлытӧм ен войтыр! 

Важӧн эз кӧ зэр-а?

Зэрмис вӧлись. Аминь важӧн эз кӧтӧд да. Кольӧм вежон кӧ-а? Чайті нин пӧчӧ гожӧм локтӧмӧн, а пӧль ар на вӧлӧма.

Овлӧны тай лунъяс

Овлӧны лунъяс, кор нинӧм гижмӧн эз и вӧв. Югдӧмсянь пемдытӧдз олім дай...  "Кыасянь кыаӧдз", шуны кӧ вылі слогӧн. Татшӧм лунӧн тыр праваӧн позьӧ нимтыны "талунъя лунсӧ" (энӧ жӧ дивитӧ "Йӧлӧгаса" цитатаысь).

Небӧгла

Талун ветлі культпоходӧ. Ывлаыс вӧлі асывсянь мича да, нинӧмла мися буса жырйын пукавны да компьютер водзын гожъявны. Выль нигаясла, важъяс бырины да, нац. библиотекаясӧ да Куратов нима музейӧ мӧдӧдчи. Сканерасигтыр унджыксӧ кабала материалтӧ налысь и босьтла.

Мӧд лун коли...

Талун воторник, ва коминас кӧ шуны - мӧдлун либӧ (перым коминас) мӧдӧдзлун, мӧдіклун... И талун жӧ сентябр мӧд лун. Ог и тӧд, гашкӧ сентяб гижны, шуанног сертиыс, либӧ нӧ кӧч тӧлысь бурджык лоӧ. Но кыла нин, мургыштӧ кӧнсюрӧ.... Ладнӧ, гижам дипломатичнӧйджыка: 

Мӧд арся лун коли, кыдзи и тавося быд лун менам, удж кежысь.

Коми гожӧм

Коми кыв вылын блогъястӧ тавося гожӧмӧдз пӧшти некод эз кут. Войдӧр буди сӧмын дона Микол Ӧльӧшным коминад гежӧдика Ставыс лоас бур!-сӧ точкӧдлӧма, да во кык сайын Зыранкаыд неминучаяснас йӧзӧдчылӧма. Сымда и вӧлі. А со, шуам, рӧдвуж удмуртъяс матӧ 40 блог нин восьтӧмаӧсь.

Таво юньнас вои кывкӧртӧдӧ: мыйкӧ мися вӧчны жӧ колӧ та боксянь. Но и шуи аслым тшӧтш лӧсьӧдны коми кывъя блогтӧ дай мукӧдсӧ ышӧдны. Лӧсьӧднысӧ эськӧ блогтортӧ и лӧсьӧді-а, гожӧмбыд мукӧдторнас ноксигтыр сідзи и эг слӧймы блогйынытӧ. Та дырйи восьтісны нин блогъяснысӧ менам ёртъясӧй: Нестерова Алёна (Алёна Тувсовъя), Афанасьева Лена (Куим Ю), Лади Микол (Кола). Дай Микол Ӧльӧшыд водзӧ коминас кыв-мӧдсӧ  корсюрӧ пукталӧ и... Сэсся быть нин лоӧ и Лавыдлы мыйкӧ гижыштавнытӧ, а то дзик нин яндзим: бур йӧзсӧ ыззьӧда, а аслым, дыш руньыдлы, быттьӧ жельтор нин бергӧдыштны некор.

Мый нӧ...