Важ русь кылӧн

Вӧлись выльмӧдім коми орфография модуль. Мӧймуся ӧшымсянь нинӧм эгӧ вӧчӧ та кузяыс. Ӧтарӧ текстъястӧ чукӧртлім. Тӧрыт да талун лун джын содталі модуль базаӧ лексика, талунсӧ медсясӧ Ӧльӧш Поповлысь. Вежи спеллерсьыным мукӧд кӧсякъяс. Луннас иналім ӧтуввезйӧ. Ӧні асланым сайтын куйлӧ программа пуктан файлыс. Войдӧр Google хостингын ӧшаліс, но жугавлӧма мыйкӧ сэні.

Ондре век ноксьӧ тыва кывкудйӧн. Некыдз оз мудз ёртӧй нимкодясьны мари сьӧлӧмыслы муса тюркизмъясӧн. Талун тываа-роча кывкуд подув вылын вӧчис тыва лексема лыддьӧг да пуктіс гугл дискӧ, медым тываяс вермисны быд кыв дорӧ содтавны индексъяс, индыны лӧсялана кывсикассӧ. Сяммасны кӧ вӧчны - сэсся позьӧ и налы, кӧрттуйтӧмъяслы, орфография модуль вӧчны. И мунас кӧ гугл диск пыр уджыс туваяслӧн, татшӧм жӧ  ногӧн кутам вӧчны и перым коми лексическӧй база. Коми пермякъяс ставӧн уськӧдчасны отсасьны дерт...

Босьтчи редактируйтны "Войвыв кодзувлы" юриндалысь. Ӧти во талун видлалі. Ставнас 1961-1970ʼ воясся лыддьӧг пукті торъя листбокӧ асланым викиӧ. Сэсся водзӧ кута лӧсьӧдавны.

Рытнас сканералі "Важ русь кылӧн" нима выль изьватас небӧг. Раскол тай джудждаммӧ.  Сійӧс и позис виччысьны. Зарни Люся да Терентьев Семен дорӧ ӧні йитчис Г. И. Канев - печӧраса инженер да коркӧя миян ютырса морт. Шензьӧмӧн шензя, кыдзи зіль коми войтырыд бырӧдӧмӧн бырӧдӧны чужан кывнысӧ... Эжва ли, изьватас ли, удорачи ли - мый вынысь коми ӧтувъялунсӧ ӧтвылысь пазӧдӧны, республикалысь подувсӧ мудзлытӧг кисьтӧны. И та дырйи ставӧн асьнысӧ патриотӧ пуктӧны... А дышджык комияслы, бара, ставыс веськодь. Жельтор буди бергӧдасны жӧ корсюрӧ, дивитӧмысь мудзасны да...

Со и артмӧ: ӧні сӧмын ми, волысьяс, колим коми кыв, а сідз кӧ и Коми Му, кутысьяс пыдди. Тешкодь!!! 

Комияс, а-у-у!!