Рохир ёрт

Воторникасим талун шӧркодя. Поводдяыс оз гажӧд да, абу кыпыд руаӧсь ми. Жугыль синмӧн видзӧдам таладор олӧм вылӧ. Но и ёна дзугыльтчынытӧ помка абу жӧ уна.

Ветлі Сыктывкарса канму университетӧ тӧдмӧдны студентъясӧс миян сайтӧн да коми кывъя ӧтуввезйӧн. Воліны вита, тшӧтш ӧти зонка. Юасис сӧмын ӧти нывка, но тайӧ пӧрйӧ быттьӧкӧ кутшӧмкӧ интерес и мукӧд йӧзыслӧн вӧлышті. Сеті пӧшти став информация - мудзисны ёна. Гортса удж - лыддьыны арся блог да гижны пасйӧдъяс. Эськӧ вӧзйи аслыныс блогъяс лӧсьӧдны-а. Тайӧ мися филолог мортыдлы зэв кивыв - пыр мыйкӧ гижны, сӧвмӧдан ассьыд гижан сямтӧ да. Окота эськӧ тӧдны - гижасны мыйкӧ оз. Вась Ленакӧд бара вензьыштім терминъяс кузя. Шуӧ, оз пӧ позь тадзи и тадзи гижнытӧ. Мися меным, пермяк мортыдлы, позьӧ... Мый меысь босьтан?!

Кафедраас сэсся чаюйтыштім Риммаа-Ленаакӧд да налӧн выль секретарныскӧд - Юля нимыс. Кӧсйи пуктыны коми раскладка кафедраса компьютеръясӧ, а админтӧг некыдз эз артмы. Парадокс тай - коми кафедра коми шыпаспӧвтӧм. Но Сыктывкарын ставыс парадокс - коми кывлы кӧ тайӧ инмӧ.

Лабораторияса уджъёртъясӧс, Ондреа-Маринааӧс, талун корлісны сӧвещайтчыны наваль сканералӧм кузя республикаса информатизация шӧринӧ, но сэтчӧс чинаяс бара вильскӧбтісны. Быттьӧкӧ эз и корны. Ту ни бу. И сизимӧд тӧлысь нин тадзи...

Комиӧді миян Рохир ёрт йылысь википедияса гижӧд. Мортыс голландеч, кывтуялысь. Тайӧ лунъясӧ сійӧ вуджис овны да уджавны Шведмуӧ, кӧні лои Уппсаласа универсиетын профессорӧн. Со и шуим ставӧн гижны сы йылысь статья Википедияӧ, быдыс аслас кывйӧн. Ӧні сэні дас куим кыв вылын нин эм Рохир Блокланд нима гижӧд.

Студентъяс луннас гарыштлісны Куратовсӧ да, рытнас тексталі Ӧльӧш Ваньлысь кык небӧгтор. Том увъя коркӧ лыддьылі жӧ сылысь кывбуръяссӧ, и весиг мукӧдсӧ тӧд вылысь кужи висьтавны. Но со талун, пӧрысьӧ нэмӧ, сьӧрсьӧн-бӧрсьӧн найӧс бара и бара лыддьывлі да, дзик мӧд пӧлӧс боксянь быттьӧкӧ воссяліс медводдза коми поэтыд...

Рытнас видзӧді, мый миян вӧчсьӧ коми блогосфераын. Тусь бара босьтчис блогйыны саридздорса да гӧравывса шойччӧг бӧрын - гашкӧ уна мый аслыспӧлӧстор гижас. Кола Микулай вежис интерфейс, гижӧ Плесовскӧйлысь пӧ лэдзӧмаӧсь выль небӧг. Колӧ, пӧпуттьӧ, кыдзкӧ аддзыны да судзӧдны нигасӧ. Тувсовъя некыдз оз гажмы, Коми кывбуръяс ланьтӧмаӧсь, Куим Ю эз и варовмыны, Ставыс лоӧ бур гежӧдика кыпалӧ ловнас, а kebrasa-лӧн олӧмыс, тыдалӧ, помасис сентябр 11ʼ лунӧ...

Войнас йӧймытӧдз сканералі Некрасовлысь Есенин кывбуръяса кыз небӧг...