Коми йӧз син водзса талунъя олӧмӧй заводитчис дай помасис пажынӧдз. Весиг, позьӧ шуны, 90 минутаӧ тӧрис.
11 часӧ ӧтлаын Лена-союзничакӧд мӧдӧдчим Курмузейланьӧ. Блогйысьны сійӧ век на оз удит - тыри быдпӧлӧс котыртчан да петкӧдчан уджӧн. Гижысь котырын ӧні мырсьӧ и ас пыддиыс, и за того парня, мӧдыс мудзлытӧг шойччӧ да. Со и ӧні тӧждыс тыр: матыстчӧны ыджыд нуӧданторъяс. Ӧт-кӧ, аски Вась Галялы тырӧ 70 арӧс. Юбилейсӧ кутасны кыпыда пасйыны, Гайзерӧн и быдӧн, медсясӧ литература музейын, талун дасьтысьӧны. Мӧд-кӧ выльлунӧ удораса аньяс кутасны юркарса коми культура шӧринын Ву юнысӧ презентуйтны (Ленаным кывбура небӧгнас, велӧдысь Калинина Ӧрина - фотояснас).
Выставка вылӧ и пыртім шӧринас картинаяс да мый. Сэсся варовитігтыр шалсйим нац. библиотекаӧдз. Турунвиж гыӧн моз вольсассис миян водзын туйным, ньӧти туйвеж дорӧ эг сувтлӧй да... Гашкӧ мый вылӧ кӧ вылісянь пас? Сэсся Лена небӧгаинас пыраліс, а ме Вась Галялысь нигаяс нуи водзӧ да киӧ сеті Баяр Любалы, музеяс нин. Сідз кӧ нин шуны, ӧти юсянь мӧд юлы козин. Лои уджыштны сэні жӧ и эникейщикӧн: отсышті ладмӧдны динамикъясӧ "Вӧрса шыяс" нима шӧйӧвоштана композишн, кодӧн аски экскурсия дырйи Любаыд кутас ичӧт челядьӧс гажӧдны-шызьӧдны. Аслым шуштӧм лои быдӧн, виччысьтӧг вӧрсаяс горӧктылісны да....
Музейса юралысь талун сетіс вӧлись меным важысянь корсьлӧм да кӧсйылӧм "Ударникъяс", Паш Миш гижӧдаясӧс. И содтіс на, мӧдысь пӧ коркӧ позяс и Ивӧ Ёгорлысь мукӧд небӧг вылӧ син чӧвтлыны. Нигаяссӧ абу на гижалӧмаӧсь, ӧтгудыр шкапын игналӧмаӧсь, роботникъяс оз тырмыны да...
Сійӧн-сорӧн и бӧр мӧді. Восьлалі тэрмасьтӧг нин, ӧтарӧ-мӧдарӧ дыша кыйкъялігмоз: зарни ар сэн и тан тӧдчыштӧ нин да. Мӧд лун пӧчӧ гожӧм и. Нимкодь, долыд... Рәхәт, сьӧд тотара ногӧн кӧ шуны. Но Печать керка водзысь воча сюрӧм Тима Лара серти аскомысь (али татчӧ бурджык гижны мӧдасыв?) майбыр олӧмыд помасяс, кӧдздӧдас да кӧтӧдас... Колӧ пӧ кыйны здуксӧ!
Печать керкаса 131ʼ номера номтӧм нин жырйын сэсся лунтыр чӧла мыйкӧкерті, шы эг сет, некодлы да. Сканералі, весалі, шӧриалі, тшӧтшӧді да пдф-ӧдз вайӧді музейса "Ударникъястӧ". "Борис Годуновыд" вӧлӧма зыранскӧя коминас гижӧм. Мый тан вӧчліс перымса Миш, гӧгӧрвотӧм. Колӧкӧ рифмаяс корсьӧма Изъюр Иваныдлы. А садьмӧм Кекурыс збыль вылассӧ шусьӧма "Кекурлӧн саймӧм", чистӧ миян мозӧн, по-пермяцки. И тырвыйӧ политкорректнӧя (абу майбыр "садьмӧм" - перым ногӧн сійӧ лоӧ "кодалӧмысь палялӧм").
Кывйӧ политика сюри да, тӧд вылӧ нӧшта ӧтитор уськӧді талунъяысь. Рытнас чӧв-лӧньсӧ торкӧма жӧ вӧлі. Сяр модаа чардбиӧн пырыштліс тӧдчана "инӧд дорйысь" мадам Дуркина. Укваса роч, марковъяслы да ковзельяслы бура тӧдса ань. Чукӧртӧ кырымпасъяс "Кыв йылысь" роч оланпаслы паныд. Роч кывсӧ пӧ сэсся кӧсйӧны тшӧтш нимтыны "рӧднӧй языкӧн" да пыртны школаса велӧдӧмӧ Роч му пасьтала. Горзӧ, воштанныд пӧ комияс ставсӧ. Ӧні жӧ петӧй протестуйтны. Мисьтӧм кывъясӧн видчӧ и. Но-о, мися, век кӧ на баба демократия дырйи олӧ-вылӧ-а? Эз и кывлы, тыдалӧ, мый важӧн нин ставсӧ решайтӧны Мӧскуаын. Йӧз вылӧ видзӧдтӧг. Да и комияс, оз-ӧ унджыкыс роч кывсӧ ӧні нин чужан кывнас бӧрйыны? Со тані и колӧ эськӧ зіля уджавны коми йӧз пӧвстын, медым воштӧмсӧ бергӧдны, коми кыв мед бара лои ас войтырлы муса. А мый тӧлкыс понъясьӧмын, да нӧшта и рочӧн. Рочьясыд роч кыв вӧсна тӧждысьӧны (гашкӧ). Налӧн мог. А миянлы колӧ ассьыным кыв дорйыны. Быдлунъя олӧмын коми йӧзкӧд комиӧн сёрнитны, быдлаӧ комиӧн гижны, унджык комиӧн лыддьысьны, челядьӧс комиӧн велӧдны. И кыпыда нуӧданторъяс дырйи мед минимум 50% юргас коми кыв....
А кылам-ӧ коми кывтӧ аски юбилеясигӧн?
Комментариев нет:
Отправить комментарий