Бырӧм кӧм

Асывнас лои водз чеччыны - талун пуктісны пара университетын. Колӧ пӧ комп. технологияясӧн тӧдмӧдны студентъясӧс. Ывлаас ХХІ нэм да. Ветлім Маринакӧд. Урок вылӧ локтіс куим ныв. Дисциплина дерт Сорокинъяслӧн кӧртӧвӧй! Интернет оз уджав. Компъясын хрюшаяс. Коми раскладка дук абу. Сы пыдди пукалӧ узбекскӧй. Азиатъяс пӧ велӧдчӧны медшӧр коми вузас тӧдчымӧн унджык комияс серти...

Куим талунъя велӧдчысь пиысь сӧмын ӧтилӧн вӧлі сьӧрас аслас ноут. Мукӧд кыкыслӧн жугалӧма пӧ... Водзкыв пыдди веськӧдлысьӧй кузя висьтасис коланлунъяс йылысь да позянлунъяс йылысь. Сэсся гижӧдіс аслас анкетаӧ, терминъяс кузяыс. Кольыштӧм каднас удиті пуктыны коми раскладка да кывкуднымӧс ноута нылыслы. Мукӧдъяс видзӧдісны да видлісны лӧсьӧдны группаяс GoldenDict-ас. Висьталі тексталӧм йылысь, мися ті тшӧтш верманныд отсасьны. Вась Лена (преподныс) кӧсйис уджӧдны студентъясӧс зачётасьӧм могысь. Видзӧдам, кыдзи артмас. Ыджыд энтузиазм талун мыйкӧ эгджык казяв.

Юим чай кафедраын. Талун вӧлӧма медбӧръя лун оулуса конференцияӧ пасйысьны. Ме дерт эг нин удит. Войнаяс локтӧны да кутшӧм войтыркостса йитӧдъяс вермасны сэсся лоны... Бӧръя мортӧдз бырӧдасны ӧта-мӧднысӧ канъясыд дай.

Быри и менам арся кӧмкот. Печать керкалань лашиктігмоз лои пыравны выльысла Центробувӧ. Ньӧби. Сэсся кута виччысьны, кор выльыс бырас. Меным век жаль важсӧ шыбитлыны. И тайӧ камашсӧ тшӧтш. Буракӧ вотяночкаяс на ньӧблісны Туркуас. Сымда туй талялӧма нёль вонас, кыті эз и ветлӧдлы. Зэв лӧсьыд вӧлі камашӧй, кок серти и. Паметь, шуны кӧ зырана ногыс...

Луннас воліс узьысь красавичаным да проф. Игушев. Мичатор тшӧтшӧдіс эпоса сканъяссӧ, а профессор письмӧасис. Лӧсьӧдім сылы пошта gmail.com-ас. Колӧкӧ и блог на кутас гижны. Менсьым вӧзйӧмӧс та кузя ыджыд интересӧн кывзіс да.

Кӧжмудорса Оля комиӧдӧма видеоурокъяс (коми шыпаспӧв, эл. кывкуд да спеллер компьютерӧ пуктӧм йылысь). Начальство ыстіс меным да, пажын бӧрын редактируйтчи. Сэсся волькӧдім-шыльӧдім текстсӧ комиӧдысьыскӧд да Семуковса Любакӧд. Корлі нӧшта ӧти рецензентӧс, но сійӧ ылӧдз мунӧма да абу нин косӧма. Тадзикӧн и ысті текстсӧ Юргансалы. Локтан вежон кутасны киноасьны. Ӧти сайын, талун петіс эрдӧ, мый шыпаспӧвйӧ коминас позьӧ личкыны, личкыштны, тотшкыны, чуткыны да точнитны... Нюдз да озыр коми кывйыд вӧлӧма.

Пемдандор воліс Гулю Галя. Буракӧ медводдзаысь миянӧ кежаліс. Налӧн талун вӧлӧм соборуйтӧны коми гижысьяс. Сійӧ тшӧтш сэтчӧ ветліс. Диктофонсӧ вунӧдіс и. Лои кайлыны союзникъясӧдз. Пӧпуттьӧ казьтышті Удорасалы век на визувттӧм юяс йылысь... Гулю Галякӧд варовитім коми аудиояс ӧтуввезйӧ лэдзӧм йылысь. Вӧчӧны пӧ ыджыд архив. Весиг компьютерад пӧ позяс босьтны файлъяссӧ сайтысь. Но кор на радиопесьтакъястӧ интернеталасны... Дивитім лингвистъясӧс, кодъяс оз убӧлитны туявны висервожса фонетика: мёс да нӱл сэні шуӧны мӧс да ныв пыддиыс.

Сёр рытнас, ставӧн мунісны да, сканераси да пелькӧді сканъястӧ. Ӧти кывйӧн кӧ, коли пыр мунан воторник. Нинӧм пасйымӧн.

Буди сьӧлӧмӧй мыйкӧ талун висьыштӧ. Сё во нин эз-а. Поводдяыд бара вежсьӧ ли мый ли... Кӧч бӧжыс ӧтарӧ дженьдаммӧ, кыдзи гижӧ аслас блогӧ Кола Микулай...

Чол-л-л-ӧм, йыр-р-р-ым!