Коми гожӧм

Коми кыв вылын блогъястӧ тавося гожӧмӧдз пӧшти некод эз кут. Войдӧр буди сӧмын дона Микол Ӧльӧшным коминад гежӧдика Ставыс лоас бур!-сӧ точкӧдлӧма, да во кык сайын Зыранкаыд неминучаяснас йӧзӧдчылӧма. Сымда и вӧлі. А со, шуам, рӧдвуж удмуртъяс матӧ 40 блог нин восьтӧмаӧсь.

Таво юньнас вои кывкӧртӧдӧ: мыйкӧ мися вӧчны жӧ колӧ та боксянь. Но и шуи аслым тшӧтш лӧсьӧдны коми кывъя блогтӧ дай мукӧдсӧ ышӧдны. Лӧсьӧднысӧ эськӧ блогтортӧ и лӧсьӧді-а, гожӧмбыд мукӧдторнас ноксигтыр сідзи и эг слӧймы блогйынытӧ. Та дырйи восьтісны нин блогъяснысӧ менам ёртъясӧй: Нестерова Алёна (Алёна Тувсовъя), Афанасьева Лена (Куим Ю), Лади Микол (Кола). Дай Микол Ӧльӧшыд водзӧ коминас кыв-мӧдсӧ  корсюрӧ пукталӧ и... Сэсся быть нин лоӧ и Лавыдлы мыйкӧ гижыштавнытӧ, а то дзик нин яндзим: бур йӧзсӧ ыззьӧда, а аслым, дыш руньыдлы, быттьӧ жельтор нин бергӧдыштны некор.

Мый нӧ...

Тайӧ гожӧмсӧ позьӧ нин шуны КОМИ ГОЖӦМӦН. Моз тӧлысьӧдз ки-кокным гӧжисны, сэсся буди вежон-мӧд гожъялыштім жӧ-а, номъясӧс бурпӧт вердны удитім и. Рочьяс да арабъяс во чӧжнас аслыныс быдсикас "тулысъяс" лӧсьӧдлӧны, вир кисьтӧны ассьыныс да йӧзыслысь. А ми тӧв и гожӧм, тулыс и ар муса коми кыв ловзьӧдам. Восьтам сійӧс асланым войтырлы да-й паськыд му югыдыслы.

Таво гожӧм унджыксӧ зілим коми кыв корпус кыпӧдны. Мый сійӧ сэтшӧмыс? Дженьыда кӧ шуны: став коми текст ӧтчукӧрӧн. Компьютерад медым ӧтилаын вӧліны. Гожӧм чӧжнас дасьтім библиография торъя коми гижысьяс да небӧгъяс кузя, быдласянь чукӧрталім коми нигаяс, сканируйтім найӧс, медым сэсся pdf форматысь текставны. Лоас кӧ кутшӧмкӧ гижӧдыс текстӧвӧй форматын, сэки, нэмъяс кежлӧ нин коляс да, коми йӧзыс вермасны вӧдитчыны сійӧн выль текстъяс лӧсьӧдігӧн.

Абу тай гусятор-а: коми кывйыд миян вочасӧн чусмӧ да кусӧ. Челядьтӧ коми бать-мамыс мевйӧдӧны унджыксӧ роч сёрниӧ. Школаын комитӧ велӧдӧны унджыксӧ йӧз кыв моз. Помкаыс ясыд. Канмусянь комилы отсӧгыс пышкайлы кокыштмӧн. Вывті канмуным "гӧль" да.  Рочьясыд сюрс пӧв унджыкӧсь и. Асьныд пӧ нин кыдзкӧ-мыйкӧ, комияс.

Со и колӧ аслыным вӧлись збыльвыв котыртчыны. Абу куш йӧктӧм-сьылӧм да варгӧм-бызгӧм могысь. Тайӧтор вылас "коми войтырыд" тырмӧ на. Колӧ артельтчыны сы вылӧ, медым кыпӧдны коми удж, и медводз дерт чужан кыв сӧвмӧдны.  Гижӧд коми кыв, коді ӧтувтӧ став войтырсӧ. Первой кӧть сы выйӧдз, медым асланым кывлӧн став озырлуныс, выныс да мичыс лоас пыр син водзаным дай йӧз син водзаныс. Медым рочьяс ни рочмӧмъясыд оз нин сэсся синмад бытшкыны, ті пӧ асьныд нинӧм онӧ вӧчӧй мам кыв вӧснаныд.

Сідз кӧ, коми войтыр, кад нин садьмыны.  Петны коми туй вылӧ. Петкӧдлыны асьнымӧс. Медым миян комияс дугдасны лыддьыны асьнысӧ косьман-быран ордвужӧн. Медым ортысь мортӧ бӧр воасны. Медым му пасьтала йӧзыс тӧдасны: комияс тай олӧны на!

Таво унджыкӧн нин босьтчылісны коми уджӧ. Дёмина Наташа, Каракчиев Влад, Макарова Катя, Нестерова Алёна, Палева Надя,  Шомысова Ира тексталісны коми небӧгъястӧ FineReader программаын. Истомин Ваня, Королёва Юля, Закар Ванькалӧн пи, Пунегова Надя да Пунегов Сергей сканируйтчисны (лӧддза-номъя дырйи отсасисны нӧшта куим роч студент).  Карманова Маша, Королёва Юля да Нестерова Алёна лӧсьӧдісны коми библиография. Булышева Наташа да Игнатова Юля корректируйтісны текстъяс LibreOffice программаын. Габова Надя, Кожевина Лена, Королёва Люба, Ӧльӧш Люба, да мукӧдыс бурмӧдісны роча-комиа ыджыд кывкуд. Унаӧн сетлісны небӧгъяс сканируйтӧм могысь.

Результатыс син водзаным: ӧтув зільӧмӧн уджыс буракодь вешйис водзлань.

Ставныдлы пӧсь сьӧлӧмсянь ыджыд и ыджыд аттьӧ, дона ёртъяс!!! 

Чайта да, сэсся и мукӧд комияс оз жӧ кутны воддза моз бокын сулавны да бугжыльтчигтыр кад абутӧм вылӧ ыстысьлыны.  Сос пуджӧмӧн кутчысясны жӧ ӧтувъя уджӧ. Кӧть неунаӧн да пуктасны жӧ ассьыныс пай. Ставнымлы коланатор вӧчам да...