Мед эськӧ...

Пӧчӧ гожӧм бара караным. Тайӧ пӧрйӧ ӧттшӧтш зарни арыскӧд. Шоныд. Лӧнь. Шуӧны тай, лун кык пӧ нӧшта чеченитас. Сэсся пом. Арыд лоас сьӧд... Пелыся во да, Микол Ӧльӧш серти кӧ, и тӧв пуксяс кӧдзыд да вира...

А ӧні ывлаыд зэв на шань да мелі, олӧмыд тырӧма ёртлун гажӧн да муслун руӧн.  Мед эськӧ нюжалас татшӧми век-а!

Пажын бӧрын ветлі нац. небӧгаинӧ. Найӧ кӧсйӧны сёрнитчыны финнъяскӧд цифруйтӧм кузя. Суйӧрсайсаяс вӧзйӧны да. А мый сканируйтӧма, мый колӧ на - оз стӧча тӧдны. Миян йӧзыс ни суомияс. Лыддьӧгъяс Хельсинкисянь бара ыстісны - ставыс ӧтгудыр. Артыс матын абу. Ковмис лун джын орччаӧдны списокъяссӧ. Вӧчны выльясӧс и. Маета!!!

Луннас тӧдмалім, аски пӧ республикаса ыджыдъяс кутасны решайтны, мый лоас миян лабораториянас. Тупкасны либӧ паськӧдасны. Ми тай нёль содтӧд мортӧс корим. А Ондре водзвыв талун юӧртӧма контакт пыр аслас мунӧм йылысь. Локтасны кӧ выль йӧзыс - велӧдас да мӧдас. Оз кӧ сетны некодӧс - усйысяс дай... Лача кутам век жӧ, олыштам на тані. Удитам на комиясӧс велӧдны...

Рытладор шыӧдчис Кудымкарса Таня. Садьмӧм Кекур кузя. Дзик вуні. Ковмис вой кежлӧ текставны да лэдзны перым коми текстсӧ молодцов конвертер пыр. Сідзсӧ тайӧ программасӧ бурджык шуны болтачев конвертер. Миян яткаса ёртлӧн ов серти, ӧд том мортыс уджтассӧ и лӧсьӧдіс во кык сайын... А мыйта на коланатор позьӧ вӧчны! Войтырыс кӧ уджаласны ӧтсӧгласӧн да дзескӧдчытӧг...