Пывсьытӧм пывсянлун

Субӧта талун. Коминад пывсянлун. Эськӧ коми радиоса Гулю Галя коркӧ ярскӧба шуис: оз лӧсяв пӧ татшӧм нимыс, ме пӧ выльлунъясӧ пывся да!

Помлуннас на шулім, енлуннас и. Кодсюрӧ и шойлуннас нимтыны вӧзйыліс. Но кыдзкӧ субӧтанад и коли. Шаббат да. Вермывлытӧм ен войтыр! 


Кодъяскӧ кӧнъяскӧ колӧкӧ и шойччӧны. Микулай суседным тай тшакавны мӧдӧдчӧма. А ми со кык йӧй бара уджалам. Ӧти мортысь кындзи некод сутки чӧжӧн эз и пырав регионкостса лаборантъястӧ тревожитны. Ондре водзӧ ноксис мари кыв лыддьӧгъясӧн. Ачым асывнас оптимизируйті "Войвыв кодзув" серти юриндалысь, аски ковмас на 1948 да 1949 вояс тыртыштны.

А пажын бӧрын тӧрытъя сканируйтӧмсӧ пелькӧдалі: сканъястӧ ковмис шӧриавны да листбокъяссӧ доръясті тшӧтшавны. Дзик ылӧсас, шуис эськӧ татчӧ Юля ёртным... Но куим "Ордымтӧ" пӧртӧма жӧ лои пдфкаясӧ. Верманныд нимкодясьыштны.

Рӧмдігӧн нин убӧлиті пуктыны КНЦ Кыв сектор сайтӧ важъя статья коми орфография йылысь. Вӧлись тай петіс эрдӧ, код кичӧвтӧмысь (водзмӧстчӧмысь) кутім ставсӧ гижны торйӧн: Гриш Паш тай вӧлӧма, медводдза зыранскӧӥ романист: ош сэтӧр, ур тшак, кӧч гоб, тури пув, сьӧла оз (оправданньӧ пыдди вайӧдӧ "анютины глазки"). Но и Сельков Микола сы дор жӧ сувтӧма. Сэксянь и "кӧрт тув" Коми Войвылас абу нин ӧти кыв...

Зэв тешкодь лыддьыны сэкся полемика. Ӧддзӧмась нин рочмыны, а сэтчӧ жӧ и ыстысьӧны, колӧ пӧ коми "грамматика" серти гижны, кыдзи пӧ ачыс народыд сёрнитӧ. Корсюрӧ бара инӧ веськавліны жӧ. Шуам, "русскӧй" кыв пӧ дзик ковтӧм, эм кӧ нин "роч" да. Тайӧтӧ сідз. Но та пыдди "енэж" - сійӧ религиозно-мистическӧй пропаганда нин - "небесаыд" сӧветскӧй ногаджыкӧсь. А "серпас" пӧ дак нач нин некытчӧ туйтӧм кыв, ӧнія живописечьяслӧн выдающӧйся произведенньӧяс абу жӧ сер пасалӧм!!!

А со нӧшта ӧткымын перл:

1. Ящерица торъя диалектъясын шусьӧ сисьгаг, лёкгаг, пежгаг, чодзув, дзодзув, шонді гусялысь, лов косьтысь. Медым оз ло разнобой колӧ пӧ примитны роч термин "ящерица"!
2. Ӧнія том йӧзлы кажитчӧны зэв страннӧйӧсь быдмӧгъяслӧн татшӧм нимъяс: ыж нёнь, кӧч вӧнь, пон кок, ыжман, пон пур, лудік турун, шыр анькытш... > вежны роч терминъясӧн!
3. Художественнӧй литератураын этшаджык колӧ употребляйтны геройяслысь нимъяс татшӧм стариннӧй патриархальнӧй начертаниеын, кыдзи Игӧ Ӧлексан, Микол Иван, Васька Сандыр Ануш, Митрей Ӧгаш. Татшӧм нимнас геройяс омӧля запоминайтчӧны читательлы.

Коньӧр коми кыв, тадзи тэнӧ йӧз бала серти и кусыньтӧма вӧлі...

Но со и помлун нин помасьӧ. Пывсьытӧг коли, но дзик шӧйӧ эг жӧ вош, мый вӧсна енсӧ ӧтарӧ ошка. Коми войтыр эськӧ татчӧ шуис: шабаш!..

Шабашлун?!!