Гӧсьтъяс волісны

Ылі гӧсьтъяс воліны талун лабораторияӧ. Немеч профессор Герсон Клумпп да эст ныв, диссертация гижысь Триин Тодеск. Зэв нимкодь вӧлі тӧдмасьны.


Г. Клумпп йывсьыс и водзджык на кывлі, весиг сылысь небӧг коркӧ лыддьылі. Но Немечмуад во чӧж олігам аддзысьлыны эз мойви. Ме уджалі Гёттингенын, сійӧ - Мюнхенын. А ветлыны Бавармуӧ сідз и эг удит. Сэсся бӧр муні Рочмуӧ, а сійӧ мӧдіс Эстмуӧ, кӧні и профессоралӧ ӧні.

Талун вӧлись Ен шуис паныдасьлыны. Унджыксӧ дерт ми Ондрекӧд петкӧдлім сійӧс, мый миян эм: и информатикаса, и лингвистикаса материалъяс. Йӧзыс зэв ёна чуймисны, кор тӧдісны, мый вылнаӧдз комияслӧн кыпӧдӧма чужан кывсӧ ӧтуввезас. Эз вӧлӧм тӧдны ни wiki.komikyv.ru, ни весиг komikyv.com йылысь. Сійӧн став петкӧдлӧмторсьыс шемӧс найӧс босьтіс... Медым кӧть кыдзкӧ кыскыштны йӧзсӧ юр бергӧдлана юӧр визувсьыс, нуӧдлім найӧс пажнайтны "Сюръяӧдз". Пастпудасьны дерт.

Гӧсьтъяс кутасны овны Сыктывкарас нӧшта кык вежон, варовитасны татчӧс кывтуялысьяскӧд, ноксьыштасны архивъясын. Университетса велӧдысь-велӧдчысьяскӧд кӧсйӧны уджалыштны асланыс темаяс серти. Профессор юасяс объект пасйӧм да асалан суффиксъяс кузя, а эст ныв - -джык суффикс кузя. (Тайӧ джыкнас коркӧ ёна и маитчим Ондрекӧд спелл-чекерсӧ вӧчигад...)

Позьӧ содтыны, мый G. S. Klumpp талун Европаын буракӧ дзик ӧти профессор, коді зіля туялӧ коми кыв. Рытыввылас коми йывсьыд ёнасӧ оз тӧдны, озджык велӧдны ни туявны сійӧс, чайтӧны, вывті роч сора да, мый сэн и бурыс... Но гашкӧ тані ми асьным мыжаӧсь. Огӧ вермӧ асьнымӧс петкӧдлыны, чудь моз век сайласям кытчӧкӧ. Кад нин петны йӧз син водзӧ! Ми ӧд му выв олысьяс на...