Ен тӧдӧ!

Вӧлись шоналыштіс талун. И дона печать керкаын сетісны шоныд. Буретш! А со ывлаыс шондітӧм. Луннас некымынысь зэрліс и. Зэрыштӧ и ӧні. Гажтӧм бара. Жарысла ли зэрысла — тӧдӧ сӧмын Ен.

Луннас сканируйтлі босьтлӧм небӧгъяс, сэсся ветлі Маршак нима небӧгаинӧ выль "порцияла". Библиотекаса ас му юкӧнас тӧдмаси выль нигавидзыськӧд. Наташа, Зулӧбса ныв, помалӧма таво бакалавриат да пырис магистратураӧ. Велӧдчӧ сэн ӧтлаын Кипиёваса Ленакӧд, коді тай миянлы отсасьӧ вӧчны роча-комиа кывкуд. Зэв шань ныв, тшайӧн юкталіс и. Тувсовъя тшӧтш вӧлі. Сёрнитлім блогъясьӧм йылысь, Вась Галя кывбурасьӧм йылысь. Нималана поэтесса талун бара нимлунасьӧ, кӧнкӧ лицейын. Вензьыштім еджыд стих йылысь. Меным тай миян рифматӧмасьӧмыс озджык кажитчы. Колӧкӧ торъя статья сэсся гижа ли мый ли та кузя. Аргументъясӧн да фактъясӧн. Талун ог нин. Юрӧй бергалӧ да. Мудзи нин ӧтарӧ сканируйтӧмысь да коми небӧгъястӧ тексталӧмысь.

Миян контактса бӧрйысьӧмын ӧні нёльӧдлун кыптіс. Вежонса нёльӧд лунсӧ тай вӧзйим тӧрыт коминас нимтыны да. Пернааяс чудьлунтӧ асланыс муслунӧн гуалісны нин да, ковмас, тыдалӧ, сэсся пекничатӧ перналунӧн вӧчны. Локтан вежон гӧлӧсуйтам. Идея вӧлі первой, медым коми да роч нимъяс вежласясны сэсся: выльлун - воторник - шӧрлун - четьверк - перналун - субӧта - вежалун. Политкорректнӧя. Тадзикӧн сӧмын кык выль кыв эськӧ лои пыртӧма: шӧрлун да перналун. Шӧрлуныд и сідз гӧгӧрвоана. Перналунтӧ йӧзыслы гӧгӧрвоӧдны на ковмас...

Но мый нӧ, бӧрйысьӧмыс мунӧ водзӧ! Кутам югзьӧдны войтырсӧ. Воторникыдлӧн прӧчент тай вочасӧн чиныштӧ жӧ. Код тӧдас, кутшӧм результат лоас бӧръяпом! Лача кутам — комилуныс вермас!