Кӧть и бӧрдны туйӧ...

Со тай. Олі жӧ кыдзкӧ верман арӧдз. Бӧрд кӧть серав! Эськӧ перестройка дырйи на чиганка томиник зонкаыдлы 37-ӧдас бырны шулӧма. И збыльысь чайті дырджык не овны. А со ловъя на, да и мырся на мый вынысь. Оз ков быдпӧлӧс глобаяслы да вангаяслы эскыны! Ӧтарӧ пӧрйӧдлӧны найӧ бур йӧзтӧ. 

Ӧтладорсянь дерт бур, кор водзвыв тӧдан кулан здуктӧ. Водзвыв он и пов мӧдар югыдӧ мунӧмсьыд. Вӧч мый кӧсъян, вӧля. Пӧрнӧй кадӧ стимул вӧлі прӧстӧй мортысь ёнджыка мырсьыны, медым удитны керны ставсӧ, мый лыдди коланаӧн, мый вӧсна сьӧлӧмӧй висьӧ. А мӧд боксянь кӧ - мыйла и тӧдтӧгыс повнытӧ. Ставӧн лоам сэні, а таладор югыдас колӧ овны, ёртасьны, радейтны, пессьыны бурлун да веськыдлун вӧсна медбӧръя здукӧдз. И веськодь, кор сійӧ суас тэнӧ.

Со, шуам, меным коми кыв важысянь вӧлі вежатор пыдди, сійӧс дорйӧмсӧ пукті аслым медшӧр могӧн. Сы вылӧ и уджала, сы вылӧ и ола. Коми кывйыд ӧд миян асланым, некӧні сэсся сійӧ абу, сӧмын миян. И мыйла миянлы воштыны сійӧс, мед кӧ став ӧнія олӧмыс тшӧктӧ ӧдйӧджык сыысь мынны и. Но огӧ тай! Тайӧ кывйыс миян, а ассьыным ми кутам дорйыны, сӧвмӧдны да кыпӧдны, кытчӧдз олам асьным!!!

Сійӧн, огӧ кутӧй бӧрдны! Кӧть мукӧддырйи туйӧ быттьӧ и бӧрдыштны. Талунъя коми олӧм вылӧ сюся видзӧдігӧн. Но мед сюсьяс сюсьялӧны да синва кисьтӧны. Ми тай век мӧдам тайӧ коми олӧмсӧ бурланьӧ кежӧдны. Медым коми му вылын коми йӧз бара майшасьтӧг сёрнитасны ас коми кыв вылын. Медым тайӧ му вылас быд сикас войтыр костын дзордзалас збыльвылас лӧсьыда да ёрт нога олӧм...