Чудитчим

Чудитчам талун. Асывсянь Ондре чуймӧдіс - локті, а сійӧ комиӧдӧ нин линукс!!! Комп. терминъяс кывкуд отсӧгӧн. Вуджӧдіс пӧшти ставсӧ, кодируйтіс да пуктіс компьютерас. Зэв нимкодь вӧлі аддзыны дисплей вылысь коми кывъя меню.

Пӧлугрудов ёрт воліс да ёна, дерт, сумлевайтчис "система" вежӧртаса инас кывйын. Меным инасыд оз жӧ сьӧлӧм вылӧ во. Кӧть и 1990-ӧд вояссянь нин вӧдитчӧны сійӧн. Мися, мӧд ног фразасӧ позьӧ кыдзкӧ вӧчны ли мый ли, медым коми мортыд пырысь-пыр гӧгӧрвоис. Ондре эськӧ чайтӧ, йӧзсӧ пӧ коми терминологияӧ велӧдны колӧ. Сэсся петісны юалӧмъяс режим кыв кузя. Микол Ӧльӧш ёна пузис, рочӧн колим да. Вӧзйи ун (он) кывйӧн вӧдитчыны. Узян режимӧ индыны кӧ, сідз и гижам - "Унмӧ".  Виччысян режимӧ кӧ - "Онмӧ". Кыкнанныс ун да, сӧмын воддзаыс кыз ун (битӧ сэк кусӧдан, да став лӧсьӧдӧмыд кольӧ), а мӧдыс кокни ун (тайӧ режим дырйи орӧдан кӧ биысь, настройкаяс вошӧны). Ог тӧд, мый йӧзыс шуасны...

Ньӧби талун выль "Ы". Коймӧд номертӧ. Ёна и критикуйтчи. Дӧзмӧдіс "сентябрЬ" гижӧмыс, диалектланьӧ кыскӧм текстсӧ сюйӧмыс, роч авторсӧ йӧзӧдӧмыс, пӧрысь йӧзкӧд интервьюасьӧмыс... Орфографиятӧ, дона ёртъясӧй, колӧ пыдди пуктыны! Торйӧн кӧ сэтшӧминас, кыт роча-комиа суйӧрыс мунӧ. Сэсся и торкны гижӧд кыв подувсӧ оз жӧ позь: гижанныд тай став коми йӧзыслы. Бӧръя кадӧ век ёнджыка тӧдчӧ гижӧд кыв нормаяс пыдди пуктытӧмыс. Быдыс асланьӧ кыскӧ. Но медъя, пырт гижӧдас гортса сёрнисьыд лексика, синтаксис диалектизируйт. Но подувсӧ мыйла пазйынытӧ - коми гижанногнымӧс? Торйӧн кӧ том комияслы колӧ дорйыны ӧтувъя коми кывнымӧс. Аскиыд миян кывйыслӧн лоас, кутанныд кӧ ӧта-мӧдлы гӧгӧрвоана гижны. И нӧшта, мыйкӧ... "Ытӧ" шуӧны, сійӧ пӧ том коми гижысьяслы "журналпуыс" пыдди, лыддьыны сійӧс томъяс жӧ кутасны. Тані буретш места том йӧзыслы и петкӧдчыны. Сійӧн миянлы, верстьӧджык йӧзлы, вешйыны колӧ сэтысь. Рочьяслы тшӧтш нинӧм сэн вӧчны. Роч муыд паськыд. Том коми войтырыс эмышт на, комиӧн на сёрнитӧны, гижӧны и. Мед томъяслӧн олӧмыс и пуӧ-гыӧ Ыад...

А ми, кык абу нин том лаборант, луннас водзӧ мырсим переносъясӧн. Уджъёртӧй вӧчис уджтас мари кывлы, а ме заводиті лӧсьӧдны табличаяс коми кывъяс кості лэччӧдӧм могысь. 

Рытнас волісны гӧсьтъяс. Перво миян выль куратор  - вӧлӧмкӧ коми морт да программист. Сэсся  немеч профессор эст нылыскӧд, козьналім налы коми кывъя материалъяс.

Рытнас пуктім контактӧ гӧлӧсуйтны чудьлун кузя. Ме мыйлакӧ чайта, бӧръясны четьверк. Кӧть и ёна мусмис нин меным чудьлуныд.  Зэв и лӧсьыда дисплейын пукалӧ да...