Ӧти лолыштӧмӧн

Луныс коли кыдзкӧ казявтӧг, ӧтчыд лолыштӧмӧн. Шоныд талун вӧлі ывлаыс. Югыд и. Карас дак зэв и зэв лӧсьыд. Сиктын гашкӧ тшӧтш. Дырджык эськӧ Коми муад татшӧм поводдя пукалас-а...

Лабораторияса уджъёртӧй муніс лунвылӧ, колӧ чайтны, воӧдчас и Козаньӧдзыс. Кутас сёрнитны сэтчӧс тӧдысьяскӧд сы йылысь, кыдзи налӧн кыв корпуссӧ вӧчӧны, шуны кӧ нин ставлы гӧгӧрвоана кывъясӧн: налысь опыт изучитны мӧдіс. А ме водзӧ мырки корпуснӧй удж. Результатыд - саридзын войт! "Войвыв кодзувлы" юриндалысьтӧ удиті редактируйтны сӧмын ӧти во. Гриш Ваньлысь сканъяссӧ пелькӧдлі кык нигасьыс.

Пажын бӧрын ковмис нӧшта и грантасьны. Мыйла? Брольснитчис кӧ, бызгышта и та йылысь. Орфография нормируйтӧм могысь колӧ, медым тӧдысьяс дасьтісны бала. Бала лӧсьӧдны аттьӧысь тэныд некод оз кут. Сійӧн колӧ корсьны сьӧм. Коми му кутысьяс деньганад юксьыны оз вермыны, налы видз-му овмӧс кыпӧдны колӧ, компьютерӧн ворсан олимпиадаяс нуӧдны и. Кольӧ сӧмын ӧти надея: Капитан Грант, удж вӧчысьяслы удждон мынтыны отсалысьыд. Институтса шефӧй, луздорсаыс, водзмӧстчис да, видлім талун тыртны да мӧдӧдны форма Рочму гум. наука фондӧ. Сё морӧ йӧйтӧдлан майшӧг! Бур кӧть юралысьӧй босьтіс унджык ноксӧ ас вылас. Сэсся кутам виччысьны, ошкасны оз водзмӧстчӧмсӧ, сюрас оз сьӧмтор. Сюрас кӧ - тӧдысьяс пӧвстын пузяс уджыд. Оз кӧ сюр - Арсяыд вӧляникӧн ставсӧ вӧчыштас. Сідз ли этадз коми гижанног во мысти лоас стандартизируйтӧма окончательнӧя & бесповоротнӧя.

Ньӧжйӧника кыв туялысьяс воалӧны шойччӧг бӧрын ИЯЛИ-ас. Витӧс нин талун аддзылі, куслытӧм би сайса керкаӧдз петалі да. Г. А. Некрасовакӧд Коммуна туй кузя гуляйтыштігмоз бурпӧт варовитім и. Олӧм йылысь, уджъяс йылысь, тӧрытъя да аскиа йылысь. Ӧти сайын, вӧзйис сійӧ меным потенциальнӧй блогйысьӧ Е. А. Игушевӧс. А мый? Гашкӧ збыльысь ышӧдны нималана профессорӧс блог гижны. Сылы тай вель унатор эм висьтавнытӧ, став коми йӧзлы кывмӧн...

Рытнас лыддьышті кывбуръяс Тувсовъя небӧгысь. Воліс поэтессаыд выльлунӧ миянӧ чолӧмасьны да "Лолыштӧмсӧ" мем козьналіс. Бурсиӧмнас весиг. Зэв нимкодьпырысь лыдди талун. Збыль лолыштӧм кодь. Кывбурась водзӧ, Алёнушка!