Дышлун

Интервьюасигӧн менсьым пыр юалӧны, мыйджык пӧ тэ вӧчан прӧст кадӧ. Воча кыв овлӧ дерт ӧти - уджаладжык. Ставӧн шемӧс. Кыдзи нӧ пӧ тэ он мудз шойччытӧгыд.  Оз быттьӧ гӧгӧрвоны - ӧт-кӧ, мудзла, а мӧд-кӧ: уджавнытӧ позьӧ зіля, а позьӧ и дышиника. 

Талун менам со татшӧм дыш лун и вӧлі. Эз кӧ нин вежалуныс комияслӧн вӧв, позис весиг вӧзйыны вежон сизимӧд лунтӧ нимтӧм могысь - дышлун. Но со вежа пӧ да, мый татчӧ дышсӧ кыскыны. Дышыс миянысь на водз чужлӧма. Бырам да, коляс и. Оз сӧмын вежалунӧ ыджыдав. Эськӧ, мӧд боксянь кӧ, вежалуныс - вежа лун. Абу дерт шабашлун кодь вежа да уджтӧм-а. Сідз ли этадз, уджавнытӧ  озджык позь. Ыджыд мыж пӧ. Енмыд бара ассьыс войтырсӧ тӧдӧ жӧ да, лэдзас пӧди коркӧ мыжнымӧс. Ми со лэдзам жӧ тай. 

Но талун, гарышті нин, дыш петіс зіля овны.  Асывсянь жӧ тайӧ тӧдчис. Позьӧ кӧ нин лун шӧр гӧгӧр палялӧмтӧ асывсянас шуны. Персональнӧй рекорд, забыль. 

Чеччи да пыр и мӧдӧдчи пажнайтны. Шура-шара кос кор вывті дышиника кокъясӧс вешталігмоз час джынйӧн воӧдчи жӧ сюръяӧ. Тані виччысьтӧг паныдаси ёртъяскӧд. Ондре асывбыд нин мырсьӧма - тӧрыт чегӧм локаль дзоньталӧма, операционка выльмӧдӧма и. А Микулайным чужан сиктсьыс, Аныбысь, воліс ӧттор-мӧдтор мыйкӧкертны удж кузяыс. Тӧрыт пӧ 30 верст шалсйӧма коми пармаясті, навигатор киас. Отпускасьӧ мортыс да, вӧр-ваті уявны оз мудз.

Ми тай дышӧдчигтыр мудзам-а.

Печать керкатӧ талун видзис зэв стрӧг морт - нинӧмла пӧ шойччан лунъясӧ заведенньӧсьыс чӧв-лӧньсӧ торкны. Мурч курччӧм пиньӧн лэдзис жӧ-а. Сэсся некымынысь на казьмӧдчис - абу-ӧ пӧ нин кадыс  гортӧ мунныыд? 

Пыри лабораторияад да, заводитчис уджаланінас кад коллялӧм. Час-мӧд корси Linux-ысь экран видзанторсӧ, кытчӧ тай дата вӧлі гижӧма. Комиӧн. Сідз и эз сюр. Вошӧма кытчӧкӧ выльмӧдчигас. Бӧръяпом Ондре тшӧктіс дугдыны йӧйталӧмысь да помавны диссер ли мый ли.  Шогманаторсьыс талун мый и уськӧдны тӧд вылӧ?.. Буди сӧмын Куратова Нина небӧгъяслы юриндалысьсӧ лӧсьӧді да ӧткымын мукӧд лыддьӧг пелькӧдышті. Рытладор помалі текставны Вӧльдінса Вольӧглысь небӧг, а гортӧ мӧдӧдчытӧдз час-мӧд вӧляника сканераси, мелілунъястӧ да мый. Тшук 23 часӧ лои дугдыны удж выв дышӧдчӧмысь да кольны печать керкатӧ. Татшӧм вӧлі приказ вахтасянь, а гашкӧ и тадзи тшӧктіс сьӧлӧм. Гортӧ мунігчӧж войся карас ылалӧм турист моз дышиника дзарпасалі пӧнар биӧн югдӧдӧм арся пуяс. Зэв мичаӧсь да.  Кос талун, шоныдкодь, лӧнь. Енэжыс кодзула и...

Печать керка водзын. Вой шӧр.

Сэсся дыш нин петӧ кнопкаястӧ личкавны, ун петӧ и.  Мукӧд дзарпасъяс аски. Гашкӧ...