Вӧйим уджӧ!

Нок, нок и нок! Асывбыд шӧриалі да тшӧтшалі сканералӧмсӧ (тундраса бияс, рӧдвуж пасъяс да мый да). Практикантъяс, тыдалӧ, оз нин удж бердӧ кутчысьны да, лоӧ аслым...

Пажын кад гӧгӧр воліс Йӧлгинь ёрт, тшӧктіс вочавидзны ӧти мари коллегалы кыв компьютермӧдӧм кузя, кыдзи тайӧ уджыс котыртӧма Коми муын. Йошкарсаыд ме дорӧ ӧнтай тшӧтш шыӧдчыліс. Письмӧысь нӧшта на гӧгӧрвои, кутшӧми мари кывйыд вына. Вӧлӧмкӧ мари ногӧн менӧ колӧ гижӧны Ыньы Лав. Мариечьяслӧн Ы-ыс кылӧ  миян Ӧ моз да.  А «Бур рыт» налӧн шусьӧ (и гижсьӧ)  «Бур рут!» - гласнӧй гармония серти!

Луннас ветлі Куратов музейӧ, мися лэдзасны  вӧлись Ивӧ Ёгор фондас. А веськӧдлысьыс ключнас бара эз вӧв офисын – талун пӧ нац. небӧгаинын «Наш современник» презентуйтчӧ, дак сійӧ сэтӧні. Век жӧ виччыси, мися гашкӧ, помасяс да, локтас жӧ. А эз тай  - сӧвещанньӧ сэсся чукӧртӧмаӧсь директор дорӧ, сэтчӧ и муніс. Отсалысьыс, Баяр Люба, воліс жӧ коркӧ удж вылас, сы телепон пыр звӧниті Гриш Дианалы да сёрнитчи четвергӧ волыны. Аскомысь быть нин лоӧ судзӧдчыны Ивӧ Ёгор небӧгъяс дорӧдз. Колӧ мем «Ударник» журнал (М. Лихачёв гижӧдъясӧн) – Кудымкар корӧ!

Лысьті талун и Баяр Любалы бара дӧзмӧдчыны: босьтчы мися тшӧтш блогъясьӧмӧ. Вочакыв вӧлі стандартнӧй: "А кӧні нӧ кадыс"? Эськӧ кӧсйысьліс жӧ, пинькырӧс, лоас кӧ печать керкаын, ӧдзӧснымӧс восьтывны. Тшӧктіс сэсся лыддьыны «Кык юнысӧ» помсянь помӧдз.  Аф. Ленакӧд ӧтлаын гижӧмаӧсь роман сямаӧс, регыд «Артас» петас. Ӧдвакӧ пӧ ӧдӧлейтан. Мися лыддям, петас кӧ. И рецензия на гижам. Кад кӧ сюрас… Кад абутӧм вылӧ, ӧти сайын, и Лена бара ыстысис, чолӧмасьны-козьнасьны воліс да. Ӧні пукала шоколадас да шензя. Мыйла ми ставӧн сэтшӧма тырим уджӧн? Коля, Лена, Люба, Оля... Ловзьыштны некор, непӧштӧ блог гижны!

Бӧр локті лабораторияӧ нёль гӧгӧр, а меным вайӧмаӧсь нин юриндалысьсӧ «Войвыв кодзувлы» 1956ʼ-1960ʼ воясысь. Зэв долыд лои! Катя зільлунӧн ми лэбзям нин регыд космосӧ!!! Сэсся войӧдз редактируйті лыддьӧгъяссӧ. Сідз и эг удит помӧдз, пукті ӧтгудыр ӧтуввезйӧ. Аски, гаж кӧ петас, а гажтӧм оз босьт, сигӧрта…