Бӧрйысигтыр

Бӧрйысян лун. Роч му пасьтала. Ӧтувъя. Кыдзи и ачыс Роч муыд. Сідзсӧ, быд регионас ассьыныс бӧрйӧны. Натшальствотӧ. Кӧні мэртӧ, кӧні губернатортӧ, кӧні уезднӧй воеводаястӧ. А комияс со Кайзерӧс бӧрйӧны. И вермам на тшапа шуны, мый татшӧмыс сӧмын миян!

Асывсяньыс, Коммуна туй кузя уджавны лэччи да, йӧзыс тӧдчымӧн унджык вӧлі жуӧ-гыӧ. Дзирдалӧ шонді. Ышмӧдан ыркыд. Енэжлӧн лӧзыс да турунлӧн вижыс сӧльнитчӧны нин кельдӧдны заводитан корнас. Гӧрд пелысьыд синтӧ ёрӧ и. Еджыд рӧмыс матын абу. Гений Горчаков! Тырмас нин, зонмӧ, коми кыптӧ кыскавны! Дӧрапаснымлы выль рӧмъястӧ думышт: медым лӧсялісны тшук талунъя миян олӧмыслы. Югыд аскиа луннымлы!

Люзьгӧны йӧзыс Коммуна туй кузя... Зэв унаӧн гозйӧнӧсь. Томъяс и олӧмаяс. Челядяӧсь и. Чужӧмъяс кыпыдӧсь, восьласныс зумыд. Сёрнисьыныд чуть да и бара кыйыштан бӧрйысян нотаястӧ. Кутшӧм сӧзнательнӧй войтыр олӧ Сыктывкарын! Ӧльӧшыд со юӧртіс жӧ канлы ассьыс уджйӧз мынтӧм йывсьыс, выль блогсӧ восьтіс да. Весиг Ондреным тшӧтш йиджтысьӧма татчӧс руӧн. И кӧть Ёшкаас войковтлӧ ӧні, но ветлӧма жӧ бӧрйысян пельӧсӧ, пӧдласян выйӧдзысджык эськӧ-й кыскыштіс-а.

Ставӧн талунъя кодь жӧ югыд аскиа лун бӧрйӧны. А со Арсяыдлы эз и мойви кипасасьны. Абу татчӧс карувса да. Эз эськӧ удитны 1990ʼ восясӧ коми гражданствотӧ лӧсьӧдны-а. Ог лысьт тан олысьяс пыдди бӧрйыны юралысьтӧ! Ми тай сӧмын уджалысь мигрантъяс.  Волысь йӧз. Уджсӧ вӧчам да усйысям гортладорӧ, либӧ нӧшта кытчӧкӧ, кӧні миянӧс виччысьӧныджык, кӧні ми коланаджыкӧсь. Окота эськӧ велӧдны коми йӧзӧс ставторйӧ, мыйӧ велалім и мый кужам ӧні асьным. Медым эз кус миян бӧрын сійӧ бипурыс, кодӧс пестім да видзам на. Медым и кузь тӧвся войясӧ ымралас, шонтас лача да югдӧдлас комилы туйсӧ... 

Но кыдзкӧ ньӧжмыда ставыс чужӧ, сӧвмӧ-быдмӧ да кисьмӧ тані, Ылі Войвылад...