Важӧн эз кӧ зэр-а?

Зэрмис вӧлись. Аминь важӧн эз кӧтӧд да. Кольӧм вежон кӧ-а? Чайті нин пӧчӧ гожӧм локтӧмӧн, а пӧль ар на вӧлӧма.

Поводдя вежсигӧн пӧрысьӧ-нэмӧ и ас лы-сьӧрнад кымрасьӧмсӧ кылан. Талун со садьми водз. Сюзь кӧ и. Весиг 7 час на эз вӧв. Ракаяскӧд тшӧтш синмӧс восьті. А ловзьыны дыш. Букшасьӧ да. Сӧмын сэки, кор кадыс 9-ысь петіс, шуи аслым: этш мися тӧдны колӧ, Лав ёрт: водзын тыр-вира уджалан лун. Мед нӧ пекничанас шусьӧ. Коми кывйыд ӧтарӧ бырӧ и. Звирк чеччи, мысси-кӧмаси-нопъяси да ӧдзӧсӧ.

Сёрма вӧлі да, мӧді автобусӧн, сё нин мися ӧдйӧджык подӧн дорысь. Но дилижансным талун дудан вӧлӧн вӧлӧма, чуть да и бара джӧмдылас. Быд сьветопор водзын вишким-виччысим минут-мӧд-коймӧд. Енсӧ оз повны легендарнӧй Сыктывкарын олысьяс, каркодьнас ветлӧны, тыдалӧ, машинаясӧн удж вылӧ, туйсӧ поромитӧны. Со тай - Шӧр туйвеж водзвылас Коммуна кузя лэччысь «икарусӧй»-батюшкоӧй Куслытӧм би весьтсяньыс нин ньӧжмӧдчис пода морт ӧдйӧдз...

Сёрмӧмӧй, сідзкӧ, кӧсйис лоны сурьёзнӧй. "Мый лоас ло!" - шулӧны татшӧм кодь пикӧ воӧм йӧз. Ме кокньыд мывкыдаси жӧ. Эз кӧ нин артмы кутны уджвывса дисциплина, пыра нӧ копеясьны! Сэсся мися ударнӧя тыртам да вевтыртам кыдзкӧ... Вӧйпӧмысь эськӧ эг жӧ мын-а. Уджъёртӧй 8-сянь нин ударничайтӧ вӧлі да… Майбыр юралысьным талун гортас, документъясӧн рӧбитӧ…

Асывся 10 часӧдз Висер Ӧльыслысь висьт-повесьтсӧ txt форматысь docx форматӧ пӧрталі. Кытсюрӧ пелькӧдыштны на лои: шуам вежлалі «чачӧсӧ» «чачанас» да «мыйттасӧ» «мыйтаӧн». Некымын кӧсяк сюри жӧ. Шуам 5-ысь «мыйла» пыдди «мыйда» пукалӧма. Абишнӧй продуктыс сорсьӧма тексталігӧн, а нывкаяс абу казялӧмны… Но медся маетнӧ вӧлӧма вежны формат. Нёльӧд судтаын миян Печать керкаас сӧмын ворд признайтӧны да, мӧд ног некыдз.  Коліс восьтавны сьӧрсьӧн-бӧрсьӧн 87 файл да сокранитавны вордовскӧй документ пыдди. Пӧсь йыв нок. Нуи сэсся вӧлись тайӧ файлъяссӧ авторлы. Мукӧдсӧ кӧсйыси вайны сёрӧнджык тайӧ жӧ лун чӧжӧн. И кӧсйӧмсӧ пӧрті олӧмӧ. Кад вӧлі кыкӧн-джынйӧн, кор вайи коляссӧ да гӧгӧрвоӧді быдпӧлӧс, кыдзи тані шулӧны, «нюансъяс»… Воим сёрниӧ Висер Ӧльяскӧд. Найӧ висьталісны некымын тешкодь лоӧмтор, коді кутшӧмакӧ тайӧ текстъяслы инӧ вӧлі. Шуам, мыйла «Мыйсяма олысьяс» пьесаын, медводдза да медбӧръя изданньӧ костын 5 доз вина пыдди 1 доз коли… Но и уна мукӧд татшӧмтор.

Сэсся асьныс лӧсьӧдасны гижӧмсӧ да корректор на лыддяс, а бӧръяпом миянлы коми корпусӧ дӧнзясны аутентичнӧй текстъяс, автор киӧн пернапасалӧмаӧсь. Ен мед отсалас Висер Ӧльыслы и ПСС-сӧ йӧзӧдны!

Талун миян син водзӧ дорвыв явитчылісны некымын мича ныв.

Ӧтиыс – гожся роч практиканточка, зӧвсьӧртса. Лӧддза-номъя дырйи кык-куим лун воліс сканерасьны, а сэсся кутіс дзайгыны, кыдзи пӧ бур «на дому» практикуйтчыны. Сетлі сылы бӧръяпом сканируйтӧм могысь «Коми народнӧй эпос» да лэдзи Зӧвсьӧртас. Мися вӧчан кӧ – зачёт босьтан. Талун, каникуласьӧмыслы пом лои да, воис нывкаыд лабораторияӧ. Небӧгыс коли дерт ӧнӧдз вӧрзьӧдлытӧм. Пуксис сканируйтны эпостӧ миянын. Час джын коли, видзӧда да, узьӧ нин сканировщичаным. Чӧскыда узьӧ, и садьмӧдны кыдзкӧ абу лӧсьыд. Татшӧм узьысь саровна! Но сэсся, мойдын моз, королевич сыла воис, пуксисны автоӧ дай ныр улысь тӧвзисны, кӧсйысис эськӧ дэвушкаыс сэсся вӧскресенньӧнас матыстчыны – водзӧ уджавны…

Рытъявыласджык волісны и мича коми нывъяс. Найӧ дзик мӧдарӧ – авъяӧсь да зільӧсь, абу тайӧ роч руньӧ кодьӧсь.

Том поэтесса Баженова Олялы вӧзйим гижны текстовка миян видеоурокъясӧ. Шуны кӧ, сентябр помын РФ-са финн-йӧгра культура шӧрин кӧсйӧ дасьтыны видео, медым йӧзыс велалісны пуктыны коми раскладка, эл. кывкудъяс, орфография видлалан модульяс да мый да. Ӧтчыд кӧ пӧ кутшӧмкӧ удж аддзан,  сё пӧв ӧдйӧджык велалан. Куш висьталӧм дорысь. Но гӧгӧрвоӧдтӧг оз жӧ позь. Сійӧн и Оляыд дасьтӧ ӧні баласӧ. Сідз кӧ нин шуны, сценаристалӧ. Комиӧн лоас ролик, гашкӧ роч субтитръясӧн. А колӧкӧ и рочӧн тшӧтш шыӧдасны. Лыддьынысӧ корим Королёва Любаӧс, юрганса телекодзувнымӧс. Чайта да, нывъяслӧн ставыс артмас, и коми йӧзыс зіля тыртасны ассьыныс компьютеръяс коми раскладкаӧн, коми кывкудъясӧн, спелл-чекеръясӧн да мукӧд коланаторйӧн.

Бӧръя кадӧ тай «сӧвмӧ мода» коми блогъяс вылӧ. Со и талун вӧлі лӧсьӧдӧма кык выль блог. Ӧтиыс, Оля Баженовалӧн, шусьӧ «Коми кывбуръяс». Нимыс тырвыйӧ гӧгӧрвоана, нывкаыд енбиа кывбуралысь да. Кутам виччысьны серпаса гижӧдъяс, дай мича серпасъяс – на вылӧ Оляыдлӧн ыджыд жӧ сямыс.

А со мӧд блоглӧн нимыс первой коли миянлы ыджыд гусяторйӧн. Лӧсьӧдіс сійӧс том журналист, мияслӧн «Веськыд Ки да Тэрыб Кок» – Лобанова Женя. Югдӧдліс жӧ талун аслас волӧмӧн рытъя олӧмнымӧс. Зэр пыр локтӧма. И блогсӧ шуӧма «Тусь». Мыйла тусьыс – эз висьтась… Сэсся, блогас нин, воссяс жӧ – уна пӧ вежӧртаса вӧлӧма кывйыд. Видлім тарыт Женяыскӧд вежӧртны Гуглыслысь гуг и бансӧ. Ачым тай неважъя жӧ блогйысьыд да, лоӧ на синтӧм кутю моз зурасьны. Ӧтувъя вежӧрӧн мыйсюрӧ сяммим жӧ гӧгӧрвоны – гугляшнӧй «кругъяс» да мый да май да.  Сэсся ог нин гуглитӧм кежысь кольӧй!

Тэрыб Кок пышйис да, Веськыд Китӧг эз нин ло гажа интернетасьны…  Лӧня пукси сканируйтчыны, ӧнтай ваялӧм небӧг-журналыс тай тыр, ӧнӧдз на восьтывтӧмӧсь. Войӧдз и цифруйтчи. А Ондре пӧшти лунтыр талун оліс параллельнӧя, шаманитіс мари кывкуднас… Кадысь кадӧ «выборА» кежлӧ музыкальнӧя дасьтысигтыр.

Ставӧн бӧрйысьны! Блогйыны ставӧн!