Небӧгла

Талун ветлі культпоходӧ. Ывлаыс вӧлі асывсянь мича да, нинӧмла мися буса жырйын пукавны да компьютер водзын гожъявны. Выль нигаясла, важъяс бырины да, нац. библиотекаясӧ да Куратов нима музейӧ мӧдӧдчи. Сканерасигтыр унджыксӧ кабала материалтӧ налысь и босьтла.



Небӧгаинъясӧ, шуны кӧ веськыда, весь вӧлі ветлӧма. Ленинкаысь ни Маршакысь колана  йӧзсӧ эг су да. Роча-мариа кывкуд эз жӧ сюр. Ондрелы уджӧ колӧ вӧлі. Содтӧд кӧсйи коми раскладка пуктыны НБРК-са комплектуйтысьяслы. Водзджык найӧ интерес петкӧдлісны, а ӧні шуӧны, оз пӧ ёна и ков...  Но и мед олӧны.

Нац. небӧгаинъясысь, гарышті нин, тӧдсаясӧс эг аддзыв. Та пыдди музейсьыс небӧгвидзысьяс бӧръяпом сюрины. Первой, эз жӧ вӧвны местаас да, весиг гуляйтыштны лои Киров паркті. Буракӧ ӧтчыд ли кыкысь коркӧ кежавлі жӧ сэтчӧ войдӧр. Но талун сідз, нинӧм вӧчӧмысь, пыралі дай ӧтнам вӧлі. Збыль кажитчис, ар пуксьӧ да майбыр. Войтырыс этша. Луныс югыд. Ыркыд эськӧ, а шондіа. "Вӧр"-ва вӧлись дорам! Чайті, час чӧж ковмас коллявны «прӧст кад», кыдзокъяскӧд сывъясьны. Мися шойччан лун ли мый аслым лӧсьӧдны. Но сэсся регыд мича ывлавывнад тӧдмасьӧмӧй помасис. Музейсьыд звӧнитісны да. Позьӧ пӧ волыны. Кайышті Куратов музейӧдз. 

Варовитім сэтчӧс аньяскӧд, унджыксӧ параллельнӧй миръяс йылысь. Петкӧдлі налы ассьым крутӧй телепон. Неважӧн тай, важсӧ гусялісны да, ковмис выльӧс ньӧбны. Андроида лои. Сэтчӧ верма весиг коми шыпасъяс веськыда пуктыны смскаяс гижигӧн. Некутшӧм падмӧд. И та дырйи унаӧн на элясьӧны – рочӧн пӧ гижам, коминас ӧ  да і ог вермӧй пуктыны да. Весьшӧрӧ, ёртъяс, норасьӧмныд. Андроид кӧ нин эм, позьӧ сэтчӧ и коми раскладка, и комиа-роча кывкуд пуктыны (аудионас и быдӧн). 

Но, сеті бӧр сканируйтӧм небӧгъяс, важӧн нин коркӧ босьтлӧмтӧ.  Сэсся выльясӧс корси. Джаджъясын лукйысьны лэдзӧны да майбыр. Талун  сюри Гриш Пашлӧн роман, Иливапыслӧн кык важъя небӧг да куим нумер «Ордым» журнал. Торъя нумеръяс кокниа сканируйтчӧны да, регыд пукта нин пдфкаяснысӧ ӧтуввезйӧ. Перымса комияс ӧнтай корисны «Ударник» журналысь «извлекитны» миян классик М.П. Лихачёвлысь кык гижӧд: «Кекур саймӧ» да «Борис Годунов». Бӧръясӧ эськӧ МПЛ комиӧдӧма ӧтлаын Изъюр Иванкӧд да, кутшӧм нӧ и кыв сэні? Колӧкӧ перыма-зырана да. Син водзам лоас кӧ, видзӧдлам. Талун эг воӧдчы «Ударникъясӧдз», Торлопов фондын пӧ куйлӧны, а фондысь ключ директорша дорын,  коді лунтыр экскурсоводалӧ. Эг кут торкны ыджыд йӧзтӧ да мӧдӧдчи сэсся уджлань квайт небӧг кежысь.  

Пырмунігмоз кежалі «Пельнянь-2» сёянінӧ,  нуръясьышті шыдӧн да дерт жӧ майонезӧсь пельняньӧн. Дышӧдіс нин, бӧръя кадӧ ставӧн ӧтарӧ дивитӧны да, барин моз пӧ «Паст-Пудын» чӧсмасян. Талун прӧявиті классӧвӧй сӧзнательносьт да «Пельнянь-2»-ын пажнайті. Весиг 50 шайтӧн этшаджык и мынті. Трудӧвӧй массаяс вермасны лоны здӧвӧльӧнӧсь. Гашкӧ народ вӧрӧгъяс пиӧ ог на шед.

Удж вылӧ локті, а татчӧ начальничаным производственнӧй сӧвещанньӧ котыртӧма. Мыйта помнита, тайӧ мӧд татшӧм дивӧыс миян кантора историяын. Но, мый йылысь вӧлі сёрни, мед кольӧ интригаӧн. А сэсся куш удж и вӧлі. Медводз Висер Ӧльӧс  корректируйті. Вӧчи сы серти ичӧтик кывӧктӧд. Мортыслӧн аслыспӧлӧс лексика мыйтакӧ эмышт жӧ, кӧть и Ыджыдвиддзыд рулитӧ талун гижӧд кыв видзӧмын. 

Текстъяссӧ видлалігмоз дышӧдіс менӧ вӧлись шыблавлыны найӧс Gedit программаысь LibreOfficeʼнӧй программаӧ да бӧр. Пукті мог Ондрелы. Ёртӧй минут-мӧдӧн аддзис, кыдзи ладмӧдны коми орфография видлалысьтӧ гедитӧ.  А водзджык мыйта мырсим!.. Тадзикӧн, «шутками-прибаутками», бара ыджыд воськов водзӧ вӧлі вӧчӧма 2014ʼ сентяб(р) 3ʼ лунӧ. И мед тайӧ лун оз пыр историяӧ, но... Нокыс, збыльысь, сё пӧв этшаджык лои. Ӧні корсям техникаса подув, медым переносъяс позяс автоматӧн пуктавны.

Висер Ӧльтӧ талун бара вой шӧр сайӧдз ковмас лыддьыны. Сійӧн и блогйӧмысь-больгӧмысь лоӧ аскиӧдз дугдыны.  Гашкӧ садьмам на… Кекур моз... Кыдзи шулӧны миян Перым муын – ашынӧдз!