Бара югыд

Коді нӧ мудзас нимкодясьны зарни арнас, Ӧльӧш! Луннас кӧть войнас ӧтмоза синтӧ малалӧ да сьӧлӧмтӧ личӧдӧ. Козьналіс тай Енмыд! Лышкыда. Татшӧм здукъясӧ, ло кӧть кутшӧм пессимистӧн, кӧсъян мыйлакӧ эскыны: олӧмыдлы тай абу на пом...

Тайӧ лун бара ӧткаса удж кежысь коли. Унатор вӧлі вӧчӧма. Лун-лун сканераси да текстаси да. Ӧтчыд коставлӧмӧн, шуны кӧ нин.

Буретш сэки слӧймылі некымын час чӧж орччӧнмоз кывтыштны татчӧс коймӧд юкӧд... Мый нӧ, сюри тай! Шондіа жӧ вӧлӧма юыс. Сӧстӧм ёльнас жӧ коркӧ сёльгӧма-жургӧма, сэсся лабутнӧйджыка нин шлывгӧ водзӧ. Ломзьыліс бара-й шонді да помтӧм и дортӧм енъюгыдыс ловзьыліс моз талун ӧттшӧтш визувтіганым. Кыпӧдчылім ми муса енэж сайӧдзыс да лэччылім мупытшса би дорӧдзыс. Сёльӧдчим проза из бердті да йиджтысьлім кывбур руӧн. Бырӧдлім му помъяс да кырӧдлім ва доръяс. Дзумгысьлім коркӧ кольӧмаӧ да качӧдлім нӧшта лоанаӧ... Помасьлытӧм лача кодь пыдӧстӧм синмыс шондіа юыдлӧн. Мед оз гудыртлы сӧдзсӧ да югыдсӧ миян му выв вылӧмыд, лӧгыд да шогыд!

Позис дерт муртса на серпасалӧмтӧ и еджыд стикӧдны, кывбурын моз визьясӧ чеглавны, чут-чутікъястӧ чышкавны да ичӧт шыпасъясӧн ставсӧ гижавны. А ог! Важнӧй делӧясӧн тыри да, важӧн некор нин нинӧм абусӧ мыйкӧкертны. Да и делӧ рифматӧг стикасьны, йӧзсӧ збыль выв кывбуралӧмысь кӧдзӧдны. Мед доналӧ нин кывбур сьӧлӧм пиын. Коркӧ-й гашкӧ ыпнитас на петас...