ЛитоАртасигӧн

Вежон чӧж зэртӧм да мича!!! Пекнича нин кольӧ... Со и эскы туналысьяслы...

Лунтыр нокси Микит Нина гижӧдъясӧн. Кор и сигӧртча?! Забыль, кебраса аньыд тшӧтш пайсӧ пуктӧма коми гижӧд кывтӧ косявлӧмӧ... Бӧръя небӧгъясас диалектса гижанногыс чулькйӧн нин пуӧ да... Но коми кывсӧ коми гижысьяс киӧн пазӧдӧм йылысь колӧ торйӧн сёрнитны...

Пажнайтны муніганым паныд сюри Баяр Люба. ЛитоАртасьны тэрмасьӧ. Кыдзи пӧ сідз, — шуӧ, — Ӧньӧ Лав пӧ коми кывнас абу на пӧт ли мый? Пӧтан мися тіян... Гаж эськӧ бырӧ нин со, лыддьысигад...

ЛитоАртын дасьтӧны "Ы"-лы выль номер. Гамса нылыд сійӧс лӧсьӧдӧ, Скӧрӧдумса да Важгортса отсӧгӧн. Таысь кындзи, Куим Ю Лена серти кӧ, коми поэтессаяс кӧсйӧны бара асланыс контактса листбокын котырӧн видлавны ӧта-мӧдлысь гижӧдъяс. А блогсӧ, тыдалӧ, оз и ловзьӧдны... Буди торъя глянеча журнал восьтасны...

Бур юӧр: Печӧра Лена вайис роча-комиа кывкудсьыс вӧчӧдлӧмторсӧ. И зэв тай лӧсьыда сылӧн артмӧма! Мися мый дыраӧн эштӧдчин, шуӧ: тӧлысьӧн-джынйӧн пӧ. Да помланяс пӧ уджыс ӧддзӧма: 1/3 вӧлі вӧчӧма моз дырйи, 2/3 — кӧч дырйи... Ставнас вӧлі матӧ 75000 визь. Сэсся босьтіс нӧшта сы ыджда жӧ юкӧн вӧчнысӧ. Мукӧдыс тулыссяньыс вӧчӧны да сибдӧмаӧсь пӧ кӧнкӧ шӧрвыйӧ. 

Гӧлӧсуйтӧді изьватас нывкасӧ чудьлун вӧсна. Быдмӧ чудьыд! Ӧти сайын гарышта: Ленаыд вӧлӧмкӧ ёна дорйӧ коми тӧлысь нимъястӧ — на дорӧ пӧ том войтыр велалӧмаӧсь нин — нинӧмла пӧ бара гудрасьнытӧ... А ме тай чайтлі, комиясыд ставӧн Лы Тун моз паныдӧсь...

Игушев пропессор вӧлись помаліс тӧрытъя манси статьясӧ, нёльӧд судтаса уджнывъёртъяс дорын мырсис талун. Миян вывті жар да. Прӧст компьютерным сӧмын немечьяслы лӧсялӧ и.

Рытнас кыкӧн коллегакӧд пудъясям, кодъясӧс босьтны лабораторияӧ, сетас кӧ Аллах содтӧд местаяс... Ми тай коркӧ мунам. Ӧдва ловъяӧсь нин да. Кодӧскӧ татчӧс йӧзсьыс велӧдны колӧ. Сюрасны кӧ на зіль да кужысь коми томъяс: Кӧжмудорысь ли, Кипиёваысь ли, Ыджыдвиддзысь ли, Скӧрӧдумысь ли... Ставкаясыд бара ӧні тӧв йылынӧсь на.

А кытчӧдз бара со лаборантала ӧтнам. Ондреыд, мудзис комиавны да, рытнас Ёшкаас шутёвтіс. Бур туй, пӧр ёрт!

Шойччан лунъясӧ кодкӧ гашкӧ отсасьны ли мый ли локтас? Комияс пӧвстысь...